Wa nay tugnaw, umaabot ang huwaw  

Haskang dugaya natong handom sa pag-abot sa bugnaw nga hangin nga Amihan sa Sugbo, Kabisay-an, ug Mindanao. Sugod sa pahibawo sa Philippine Atmospheric, Geophysical and Astronomical Services Administration (PAGASA) sa pag-abot ini niadtong Oktubre sa niaging tuig. Pero nagpabiling alimuot sa tibuok Nobyembre ug sa dakong bahin sa Disyembre.

Dihang niabot, ang Amihan nagbawon og bangis nga katalagman. Dayon nawagtang og pila ka semana. Nibalik og pila ka adlaw. Nawagtang na sab sa niaging semana. Dunay posibilidad nga hingpit nang mokagiw ug mobalik na sab og saka ang atong temperatura.

***

Duha ka buwan nga naglaway ang Sugbo, Kabisay-an, ug Mindanao sa katugnaw sa Baguio City, Batanes, ug Luzon nga unang naabtan sa Amihan. Dihang sa kataposan niabot ang Amihan sa Sugbo dayong Pasko, giubanan og daghang uwan ug kusog nga hangin. Nga niresulta sa pagbaha, pagdahili sa yuta, ug pagdagko sa bawod.

Dul-an sa gatos ang namatay, naangol, ug missing. Minilyon ang kadaot sa kabtangan ug infrastructure. Natanggong ang kaliboan ka pasahero nga namakasyon unta kay gigapos sa mga pantalan ang gagmay nga mga barko tungod sa gale warning.

***

Liwas sa Pasko, gipasaligan ang mga Sugbuanon nga mobalik ang Amihan sa Bag-ong Tuig. Pero hapit na lang matapos ang Enero ug kaupat na mosaka ang presyo sa mga produkto sa lana, wa pay katugnaw nga nabatyagan.

Hangtod nga gideklarar sa PAGASA nga nahibalik nang Amihan sa Sugbo niadtong Enero 31. Bisan di na sama katugnaw sa unang pag-abot niadtong Disyembre, ang dakong bentaha mao nga wa nay sagol nga uwan, baha, ug pagdahili sa yuta.

***

Pero sugod niadtong Huwebes, Pebrero 2, bisan sa pasalig nga nia pang Amihan sa Sugbo ug Kabisay-an, nibalik nang kaalimuot. Ang wa isulti sa forecasters gipasabot ni retired PAGASA Visayas director Oscar Tabada niadtong Biyernes: Nihuyang ang Amihan sa Luzon ug napulihan na sa init nga hangin gikan sa Pasipiko sa Sugbo ug Kabisay-an.

Matod ni Tabada magsugod pagsaka ang temperatura karong Pebrero. Gitakdang magdungan og kapupos ang Amihan ug La Niña karong Abril. Ug posibleng mopuli ang El Niño karong Mayo. Salamat sa atong pagpanamastamas sa kinaiyahan, ang global warming niseguro nga nihit ang tugnaw ug umaabot nang huwaw.