Nganong tak-om sa ilang boto
12 ka tuig ang nilabay, dihang senador pa si Presidente Ferdinand Marcos Jr., Senate President pa si Juan Ponce Enrile ug buhi pa silang Senador Miriam Defensor Santiago ug Presidente Benigno Aquino III, pormal nga nagpasakop ang Pilipinas sa International Criminal Court (ICC).
Giaprobahan ni Aquino ug gidasonan sa mayoriya sa mga senador ang pagpasakop sa Pilipinas. Si Marcos usa sa nibotar pabor, maong lisod sabton ang iyang pagdumili sa pagbalik sa ICC karon. Bugtong makapangangkon nga wa matarug ang baruganan mao si Enrile nga mao ray nisupak niadtong 2011.
* * *
Nalangay og kapin sa dekada ang pagpasilong sa Pilipinas sa ICC. Unang gipirmahan ni kanhi Presidente Joseph Estrada ang Roman Statute, nga maoy nagtukod sa ICC, niadtong 2000. Pero gipalagpot siya ni kanhi Presidente Gloria Macapagal-Arroyo pinaagi sa Edsa Dos sa 2001.
Giyak-an sa siyam ka tuig nga administrasyon ni Arroyo ang mga dokumento sa ICC. Si Aquino nay nibanhaw sa kampanya pinaagi sa pagpirma ug pagsumiter sa mga dokumento sa Senado aron madasonan. Gisugo sa 1987 Constitution nga kinahanglang ? sa mga senador ang mo-ratify sa tanang interrnational treaties.
* * *
Sa 23 ka senador (kay na-presidente man si Aquino), kapin sa ? ang 17 nga nipabor sa ICC: Santiago; Marcos; Allan Peter Cayetano; Pia Cayetano; Koko Pimentel; Vicente Sotto III; Panfilo Lacson; Chiz Escudero; Jinggoy Estrada; Gringo Honasan; Manny Villar; Sergio Osmena III; Sonny Trillanes; TG Guingona; Kiko Pangilinan; Edgardo Angara; ug Bong Revilla.
Si Enrile ra ang nisupak. Lima ang absent: Loren Legarda; Lito Lapid; Ralph Recto; Franklin Drilon; ug Joker Arroyo.
* * *
Pito sa mga ni-ratify sa ICC membership naglingkod pa sa Senado: Ang duha ka Cayetano; Pimentel; Escudero; Estrada; Revilla ug Legarda (kay bisan absent sa botasyon maoy nibiyahe sa New York aron pag-deposito sa “Instrument of Ratification” sa United Nations).
Pasagdi na lang ang pagbalitok sa kanhi senador nga mao na ang nagtungkawo sa Malakanyang, pero wa bay bisan usa na lang sa pito nga naa pa sa puwesto, ug nipasidungog sa kamakasaysayanon sa pagpasakop sa Pilipinas sa ICC ug pagduyog sa kanasuran nga nipili sa pagpatigbabaw sa Rule of Law niadtong Agosto 16, 2011, ang motingog sa pagpanalipod sa ilang boto?
- Latest
