Lang-og nga ihap sa mga minatay
Tangkod nga tulo ka tuig na human niulbo sa pandemya sa COVID-19, wa pa gihapon masulbad sa Department of Health (DOH) ang ilang problema sa pag-ihap sa mga nangamatay sa sakit. Sa kataposan nilang taho, giangkon sa DOH nga sa niaging semana pa nila na-verify ang mga nangamatay niadtong 2020, 2021, ug 2022.
Paborito nilang lusot ang COVIDKaya, ang COVID-19 tracker nga nagsige og kadaot sukad sa sinugdanan ug morag liwas sa pandemya na matarung. Mahimong mabasol ang kapakyas ni Presidente Ferdinand Marcos Jr. pagtudlo og Health secretary (pero sa unang duha ka tuig sa pandemya, inutil sa problema si kanhi Health secretary Francisco Duque).
* * *
Giangkon sa DOH update sa Enero 16 ngadto sa 22 karong tuiga, nga 104 ang nangamatay sa COVID-19. Pero siyam ra ang namatay sa Enero karong tuiga. 92% ang nangamatay sa niaging tulo na ka tuig.
Wa sila magtagad sa pagpasabot sa bulilyaso. Wa na maghisgot sa naandan nga milagruso nga rason sa inadlaw nilang updates sa nangaging katuigan nga dunay naihap nga recoveries pero, human sa dugang pakisusi, napamatud-an nga nangamatay diay.
* * *
Niang listahan sa DOH ug palihug tabang og hilak sa kaligdong sa ilang mga numero: Usa namatay sa Disyembre 2022, usa namatay sa Nobyembre 2022, walo namatay sa Pebrero 2022, pito namatay sa Enero 2022 (naghubkas na karong buwana).
Trese namatay sa Oktubre 2021, siyam namatay sa Septiyembre 2021, 12 namatay sa Agosto 2021, pito namatay sa Hulyo 2021, pito namatay sa Hulyo 2021, tulo namatay sa Mayo 2021, 12 namatay sa Abril 2021, upat namatay sa Marso 2021, usa namatay sa Pebrero 2021, tulo namatay sa Enero 2021, usa namatay sa Disyembre 2020, usa namatay sa Oktubre 2020, duha namatay sa Septiyembre 2020, duha namatay sa Agosto 2020, ug usa namatay sa Mayo 2020.
* * *
Duha ray posibleng katin-awan sa kapakyas pagtapak sa buslot sa sistema sa DOH:
• Una, way katakos ang liderato ug IT department paghapsay bisan sa labing yano nga aspeto sa kampanya batok sa COVID-19 (maong wa sab magkadimao ang pagpamalit og medical supplies ug pagpamakuna); ug
• Ikaduha, gituyo pagtago ang tinuod nga gidaghanon sa nangamatay aron pagtabon sa pataka nga pagduma sa pandemya.
- Latest
