^

Opinion

Pagbuslot sa hambog sa Maharlika  

ARANGKADA - Leo Lastimosa - The Freeman

Napugos og kaon og humble pie ang mga tigpasiugda sa pagtukod sa Maharlika Wealth Fund. Human nagpatuo nga gitun-an nila pag-ayo ang giisip nga labing gamhanan nga ideya sa pagpalambo sa nasud, nagsugod na og kumpisal sa mga buslot sa ilang sugyot.

Human ta nila patuoha nga gisugo silang Presidente Ferdinand Marcos Jr., nga ang niumol sa lagda mao ang economic managers nga gipangulohan ni Finance Secretary Benjamin Diokno ug gipanday ang balaudnon sa labing utokan nga mga sakop sa Kongreso, nabisto nga sayop ang labing importanteng bahin sa plano.

***

Labing dako nilang sayop mao ang pag-insistir nga sugo ni sa presidente, nga ang presidente maoy mangunay sa pagduma ini ug nga, segun pang kanhi presidente Gloria Macapagal Arroyo, labing gamhanang mensahe ang pasalig sa labing taas nga opisyal sa nasud nga siyay manubag sa mahitabo sa pundo.

Labing dakong buslot sa balaudnon mao ang kalambigitan sa presidente ug iyang mga paryente sa House of Representatives. Way motuo sa iyang katakos pagsabot ning komplikadong ideya. Labaw nang way mosalig nga takos siyang moduma sa pundo aron di makawat ug mabangkarota.

***

Usa sa kinadak-an nga paak sa humble pie angay nga iya ni Diokno. Kinsa nipasangil sa mga nanaway sa plano nga mga ignorante nga wa kabasa sa mga probisyon sa balaudnon.

Di ignorante si retired Supreme Court senior associate justice Antonio Carpio nga nipasidaan nga unconstitutional ang paggamit sa pundo sa Social Security System (SSS) ug Government Service Insurance System (GSIS). Di sab ignorante si Bangko Sentral Governor Felipe Medalla nga nipasidaan nga mahisamang Maharlika sa gikurakot nga 1MDB investment fund sa Malaysia.

***

Pero ang kinadak-an og hiwa sa humble pie angayng ilawog ngadto ni Jose Arnulfo Veloso, presidente ug general manager sa GSIS. Kinsa maoy labing kusganong niduso sa Maharlika ug nipasalig sa mga sakop nga mas molambo ang ilang pension ug mga benepisyo.

Mas maayo pa silang Kongresista Stella Quimbo ug kaubanan. Nakasabot nga di maayong hilabtan ang kuwarta sa GSIS nga ubos sa balaod di mahimong gamiton sa gobyerno sa laing katuyoan. Way nagpaabot nga may delicadeza si Veloso sa pag-resign. Pero hinaot nga tunlon ang iyang garbo ug mangayo og pasaylo.

MAHARLIKA WEALTH FUND

Philstar
  • Latest
Latest
Latest
abtest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with