^

Opinion

Mga gagmay ang unang mayayay  

ARANGKADA - Leo Lastimosa - The Freeman

Nahinangop ang kasagaran sa mga giimbitar, sa wa pa masira ang ABS-CBN Cebu, sa paboritong namong kapihan sa Fuente Osmeña sa Cebu City. Pero nahugno sila pagkahibawo nga ang kapihan wa mahimutang sa sud kon dili sa atbang sa Fuente.

Napugos sila og paundayon sa paglingkod sa mga bangkito ug nisiwil nga semento sa koral sa luna duol sa gate sa mga laboratoryo sa CUPSI (Cebu Ultrasound and Perinatal Services Inc.). Nahigop namo og apil ang tanang abog ug aso sa mga sakyanan. Nga posibleng maoy nakalahi ug nakalami sa kape.

***

Di espesyal ang kape. 3-in-1 sud sa paper cup. Nga kinahanglang doblehon kay nagbukal ang tubig gikan sa termos. Kon kusog ang huros sa hangin maibanan ang katugnaw sa kainit sa kape. Kon alimuot, makalimtan ang kaigang kay mas init ang kape. Malabwan sa grabeng katam-is sa kape bisan unsa kapait ang giistoryahan.

Nga nagduda ko maoy tinuod nga nakapalami. Kay gawasnong nagbinayloay ang tanang nag-abot og ang mga nakaagi lang --taxi ug habal-habal drivers, mga trabahante, mga negosyante, mga politiko, doctors, nurses, mga pasyente, traffic enforcers, reporters, ug uban pa.

***

Si Junrey Nadela ang nagtapok namong tanan. Siyay tigbangka og istorya. Ug tigpaila sa mga suki ug sa mga bag-ong nangape. Siya say nipaila sa tagduma sa kapihan. Si Pedring, karaang taga B. Rodriguez.

Way lamesa si Pedring. Iyang mga gamit gisud og dakong bag. Iyang termos gitagoan luyo sa koral sa CUPSI. Kay wa silay permiso pagpamaligya. Mahimo ra silang manghipos ug managan dayon kon senyasan na sa ubang sidewalk vendors kon dunay demolition team.

***

Human napawong ang ABS-CBN Cebu ug tungod sa pandemya, wa na mi magkatapok. Dihang gilibkas ang lockdown, nangape mi og balik ni Pedring sa mga higayon nga nakakuyog sa akong asawa sa ilang mga miting sa Cebu Maternity Hospital ug sa Cebu Woman’s Club.

Nisumbong si Pedring nga gipasidan-an sila sa demolition team nga dakpon kon di magpa-rehistro sa City Hall ug mobayad og arkabala. Pag-agi nako karong bag-o, wa na si Pedring ug wa nang kapihan. Ang gamayng luna napuno na sa nag-parking nga mga sakyanan. Di makiangayon ang kinabuhi. Ug mga gagmay ang unang maligsan.

ABS-CBN

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with