Yabo tanang kuwarta sa Maharlika

Hangtod karon nagkapuliki pa ang Department of Budget and Management (DBM) ug Department of Health (DOH) sa pagpangita og kuwarta nga ikabayad sa utang nga mga benepisyo nga gisaad ngadto sa healthcare workers sa kataposang unom ka buwan sa niaging tuig 2021.

Pero kalit nga nideklarar silang Finance Secretary Benjamin Diokno, ang Malacañang, ug ang gamhanan nga mga paryente ni Presidente Ferdinand Marcos Jr. sa House of Representatives nga dunay sobra nga ?250 bilyones nga mahimong isugod sa sunod tuig dayon sa ilang giduso ug giapura nga Maharlika Wealth Fund (MWF).

 * * *

Gilaslasan sa DBM ang budget para sa Pantawid Pamilyang Pilipino Program (4Ps) sa sunod tuig ug nahadlok ang Department of Social Welfare and Development (DSWD) nga di na sab mapadayon ang uban pa nilang mga programa pagtabang sa labing kabos ug naapiki tungod sa kakuwang sa pundo.

Pero sa usa lang ka pamilok nipasalig ang mga alyado sa administrasyon nga duna diay sobra nga kuwarta ang nasudnong gobyerno aron ibubo sa bisan unsang negosyo ug labing risgo nga investments nga mahimong mopalambo pero mahimo sab nga makapa-bangkarota sa puhonan.

 * * *

Ang Social Security System (SSS) ug Government Service Insurance System (GSIS) nipasidaan nga ang pagdugang sa pension maka-purdoy sa ilang panudlanan. Pero ang duha ka ahensiya takulahaw lang nga nag-ambak-ambak nga may sobra silang pundo nga itampo sa MWF.

Ang Land Bank of the Philippines (LBP) ug Development Bank of the Philippines (DBP) gisaway sa kakuwang sa pahuwam sa mga mag-uuma ug gagmayng mga negosyante. Pero morang giduslitan nga nagyapa-yapa na sa pag-itsa sa ilang kuwarta sa MWF.

 * * *

Ang nasudnong gobyerno nga tihik sa ayuda morang gikilatan nga manggihatagon na sa MWF. Ang nasudnong budget sa umaabot nga katuigan nga gikabalak-ang magpabiling kuwang sa dinaliang mga panginahanglan sa edukasyon ug kahimsog ug panginabuhi gitipakan nang daan para sa MWF. Ang nagbuntaog na natong mga buhis mahimong dugangan pa aron ika-pundo sa MWF. Ang nagburot natong utang dugangan pa aron pagpatambok sa panudlanan sa MWF.

Mora tang gisiging-siging sa pagtingob sa atong itlog sa usa lang ka pugaran. Nga dumalahon sa mga pamilya nga nakapa-bangkarota sa nasudnong ekonomiya ug padayong nagtipig ug nagpahimus sa ilegal nga katigayonan.