Mga Marcos ug ang Maharlika
Duha ang problema sa giplano nga Maharlika Wealth Fund nga gipasalig nga mopalambo sa panudlanan sa Pilipinas:
• Una, pulos kadugo ni Presidente Ferdinand Marcos Jr. ang tulo ka nag-unang mga tigpasiugda, silang House Speaker Martin Romualdez, iyang ig-agaw, Kongresista Sandro Marcos, iyang anak, ug Kongresista Yedda Marie Kittilstvedt Romualdez, taga Sugbo nga asawa sa speaker; ug
• Ikaduha, ang ngan nga Maharlika nibanhaw sa karaang bakak ni anhing Ferdinand Marcos Sr. nga nadiskubrehan nga pagpaburot sa iyang mga medalya ug giangkong kadaogan sa ikaduhang gubat sa kalibotan nga nakatabang sa iyang pamolitika.
* * *
Si Marcos Sr. ug ang iyang pamilya napamatud-an nga nakatumpi og ilegal nga katigayonan atol sa kapin sa duha ka dekadang diktadura nga nibangkarota sa nasudnong ekonomiya ug nilisudlisod sa kinabag-an sa katawhang Pilipinhon.
Maong manlimbawot ang atong balhibo kon maghisgot na sila sa panginahanglan pag-umol og higanteng puhonan nga i-negosyo sa kompaniya nga silay magtukod. Ang pasalig nga molambo ang nasudnong panudlanan makapahinumdom nato sa pasalig sa Tallano gold.
* * *
Ang Maharlika unang gigamit ni Marcos Sr. isip ngan sa iyang grupo sa ikaduhang gubat sa kalibotan nga iyang gipatuo nga maoy labing malampuson nga nisukol ug nipatay sa mga Hapones. Nangangkon gani siya og kredito nga nakapalangay sa pila ka adlaw sa paghagsa sa Bataan. Pero ang pormal nga imbestigasyon sa US Army niadtong 1947 nakamatuod sa mosunod:
• Peke ang Maharlika Unit nga gipatuo ni Marcos nga iyang gipangulohan; ug
• Malisyuso ang pagpamugos ni Marcos sa iyang ngan ug listahan nga lahi sa USAFIP NL (United States Army Forces in the Philippines Northern Luzon).
* * *
Si US Army Captain Elbert Curtis, sumbalik sa masuk-anon nga mensahe ni Marcos pag-insistir nga tinuod ang Maharlika, nibisto sa abilidad ni Marcos sa paggamit sa iyang politikanhong mga koneksiyon aron pagduso sa iyang hakog nga personal nga mga interes.
Iyang gikutlo si American guerilla leader Robert Lapham nga ni-detalye sa pagkatanggong ni Marcos human nasakpan ni Army Captain Ray Hunt Jr. sa pagpangolekta og kuwarta nga gipaagi og pangilad. Nagpatabang dayon si Marcos ni Manuel Roxas, kinsa brigadier general sa USAFFE (United States Army Forces in the Far East). Nga, nakatag-an ka, nipalingkawas dayon niya.
- Latest
