Misteryosong kompra sa mga bakuna

Lima ka buwan na human sa pagkanaog ni kanhi Presidente Rodrigo Duterte sa Malakanyang, wa pa gyod mahibaw-i kon pila ang kinatibuk-ang gasto sa pagpamalit og mga bakuna batok sa Covid-19. Tungod sa pagtago sa Department of Health (DOH) ug Department of Finance (DOF) sa mga transaksiyon, igo na lang ang mga senador sa pagbanabana sa gasto gikan sa P300 bilyones ngadto sa P700 bilyones.

Ang nakapait mao nga wa mag-apura si Presidente Ferdinand Marcos Jr., nga gidudahang naikog o nahadlok gyod sa niaging administrasyon, sa pagpangayo og kuwentada.

 * * *

Ang duha na ka liderato sa Commission on Audit (COA), ang una tinudlo ni Duterte ug ang ikaduha tinudlo ni Marcos, igo lang niyango sa pamalibad ni kanhi Health Secretary Francsico Duque III nga di nila ikapakita ang mga dokumento tungod sa ilang gipirmahan nga non-dosclosure agreements (NDAs) uban sa vaccine manufacturers.

Karon pang bag-o naghisgot ang COA nga mopada sila og demand letters; kon balibaran gihapon mahimong moluwat og notice of suspension; kon isnabon gihapon moluwat og notice of disallowance; ug kon magpaugat gyong DOH pugson pinaagi sa subpoena.

 * * *

Karon pa mokihol ang COA, bisan kon ang mga transaksiyon nahimo niadto pang 2020 ug 2021, kay nidemanda na og special audit ang World Bank (WB) ug Asian Development Bank (ADB). Nga, uban sa Asian Infrastructure Investment Bank (AIIB) sa China, nipautang sa administrasyong Duterte og $1.2 bilyones (P67,821,000,000.00) para sa mga bakuna.

Apil sa kabilin ni Duterte, nga nisaad pagbadlong sa pangurakot, ang binilyon ka pesos nga balor sa nangalisbo nga mga transaksiyon.

 * * *

Laing utang sa COA maong nalangayng special audit sa P14 bilyones nga mga transaksiyon sa DOH uban sa Pharmally Pharmaceutical Corporation. Gigil-asan tingali sa rekomendasyon sa kanhi pangu sa Senate Blue Ribbon Committee, kanhi Senador Dick Gordon, nga ikiha silang Duterte ug iyang mga sinaligan sa binuang nga mga kontrata.

Ang daotang balita mao nga way sukaranan ang paglaom nga tarung ang bag-ong pangu sa COA. Si Gamaliel Cordoba gikaintapan sa kinadak-an niyang nahimo isip kanhi tagduma sa National Telecommunications Commission (NTC): Ang pagpagamit sa panggukod sa kanhi presidente ug pagpawong sa ABS-CBN.