Kitay magpas-an sa ilang utang
Ang maayong balita mao nga nikita ang nasudnong gobyerno og P288.9 bilyones sa Oktubre karong tuiga. Ang daotang balita mao nga mas dako ang gasto sa nasudnong gobyerno sa samang buwan, niabot og P387.9 bilyones. Sa ato pa, alkanse ta og P99.1 bilyones.
Mas dako ang alkanse kon ikumparar sa samang buwan sa niaging tuig atol sa administrasyon ni kanhi presidente Rodrigo Duterte. Kinsa utrong wa magkadimao pagduma sa nasudnong ekonomiya. Nilabaw ang gasto kay sa kita ni Duterte sa Oktubre 2021 bale og P64.3 bilyones.
***
Kahibudngan ni kay wa na ta magsige og kompra og mga bakuna batok sa COVID-19 sa niaging buwan. Wa say bag-ong mga ayuda nga gihatag ang administrasyon ni Presidente Ferdinand Marcos Jr. ngadto sa mga pamilya nga labing naapiki sa paspas nga pagsulbong sa presyo sa mga palaliton ug patibugsok sa peso atubangan sa dolyar.
Labawng kahibulongan ang pagburot sa alkanse kay giablihan nang nasudnong ekonomiya ug gitugotang mosuroy nang lokal ug langyawng mga turista. Bugtong posibleng katin-awan mao nga mas dako ang gasto ni Marcos kay sa iyang gipulihan.
***
Imbes kurhian, gisamotan pang Marcos ang gihimo ni Duterte nga patuyang nga gasto labaw sa katakos sa nasudnong panudlanan. Maong gikan sa Enero hangtod sa Oktubre ning tuiga, nga naglakip sa kataposang unom ka buwan ni Duterte ug sa unang upat ka buwan ni Marcos, nigasto ang nasudnong gobyerno og P4 trilyones.
Kini bisan kon P2.9 trilyones ray kinatibuk-ang kita. Gibanabana sa Bureau of Treasury nga molabaw og P1.7 trilyones ang gasto kay sa kita sa gobyerno sa pagtapos sa 2022.
***
Wa motagam sa dakong utang ni Duterte, nagpadayon sa pagpangutang si Marcos. Puno sa P12.97 trilyones nga utang nga gibilin ni Duterte niadtong Hunyo, si Marcos nakautang na og labing menos P113.4 bilyones hangtod sa Oktubre ning tuiga.
Ug mangutang pa g’yud sila og dugang. Gitakdang moburot ang atong utang ngadto sa P14.63 trilyones sa 2023 human sa unang tuig sa administrasyong Marcos. Sa kuwentada sa mga ekonomista ang kada usa sa 110 milyones ka Pilipino, apil nang bag-o pang nahimugso nga mga bata, utangan na og P133,000.
- Latest
