Wa mailad ang ICC
Palihug subaya kinsa ray mailad ining ilang salida:
- Kapin 30,000 ang nangamatay sa kampanya batok sa ilegal nga drugas sukad sa pagbanos ni Presidente Rodrigo Duterte sa Malakanyang niadtong 2016;
- 6,229 ray giangkon sa Philippine National Police (PNP) nga nangamatay sa mga operasyon nga ilang gipasiugdahan;
- 302 ra ka kaso ang ilang gisumiter aron ma-review sa Department of Justice (DOJ); ug
- Sa mayoriya sa mga kaso nga nasubli, nakaplagan sa DOJ ang kalapasan sa mga lagda sa PNP, nga nakapahimutang sa pagduda sa pangangkon nga nisukol ang mga biktima.
***
Ang ilang review sa mga kaso gigamit ni Justice Secretary Menardo Guevarra pag-awhag sa International Criminal Court (ICC) sa pagsuspenso sa imbestigasyon sa mga pasangil sa crimes against humanity batok ni Presidente Duterte.
Pinasubay sa ilang mga lagda, nisugot ang ICC. Gisuspenso ang pormal nilang imbestigasyon sa kaso ni Duterte niadtong Nobyembre sa niaging tuig. Aron hatagan og higayon ang administrasyon sa pagmatuod nga wa nila yak-i ang laktod nga pinatyanay. Human sa unom ka buwan nga pagpaniid, nakumbinser si ICC Prosecutor Karim Khan nga taphaw ang review sa DOJ.
***
Di mabasol si Khan sa iyang rekomendasyon nga ipadayon sa ICC ang pormal nga imbestigasyon batok ni Duterte ug sa iyang mga sinugo:
-1% ra sa tanang kaso sa extrajudicial killings nga na-dokumento sa human rights groups ang gi-review sa DOJ;
-4.8% ra sa mga patay nga giangkon sa PNP ang gi-review sa DOJ; ug
-Wa kapasabot ang DOJ giunsa ang review, nakigsulti ba sa mga polis ug mga tagtungod sa mga biktima, o igo rang nibasa sa mga papel nga gihatag sa PNP.
***
Kon aprobahan sa ICC ang rekomendasyon ni Khan, mapadayong paghipos sa mga ebidensiya ug testimoniya. Apil nang pasangil ni Arturo Lascañas, nikumpisal nga berdugo sa Davao Death Squad, nga si Duterte ang utok sa pinatyanay sa Davao City sa wa pay 2016.
Kon mapadayong pormal nga imbestigasyon, mahimong ipadakop sa ICC si Duterte. Pero samtang mapapas nang presidential immunity sugod sa udtong tutok karong Hunyo 30, ang sunod nga administrasyon mahimong modupa niya ug padayong moluok sa pagpangita og hustisya sa usa sa labing duguong yugto sa atong kasaysayan.
- Latest
