Mas maayo ang suspenso sa buhis  

Napamatud-an nga pulos bakak ang mga pasalig sa administrasyon ni Presidente Rodrigo Duterte sa pagbasura sa kampanya pagsuspenso sa excise tax sa krudo, gasolina, ug ubang produkto sa lana:

- Nga gamay ra ang epekto sa pag-atake sa Russia sa Ukraine kay layo ra ang Pilipinas ug gamay ra ang atong mga transaksiyon sa duha ka nasud;

- Nga ang pagsaka sa presyo sa lana gamay ra og epekto sa presyo sa inadlaw nga mga panginahanglan; ug

- Nga mas makiangayon nga ang labing maapiki sa kamahal sa lana ang hatagan og ayuda.

***

Sukwahi sa ulug-ulog sa economic managers ni Presidente Duterte, natay-og ang tanang kanasuran. Nipasidaan nang World Bank og stagflation (paspas nga sulbong sa presyo ug tibugsok sa ekonomiya). Kay tanang industriya nagsalig sa lana. Ug tanang kanasuran naigo sa kaguliyang sa kalibotanong binayloay sa mga produkto ug mga serbisyo.

Nabalit-ad sab ang ilang pasalig sa presyo sa mga palaliton: Kaduha na umintohi sa Department of Trade and Industry ang mga presyo sa sardinas, linatang karne, noodles, gatas, sabon, mantika, ug uban pa (una niadtong Enero ug ikaduha niadtong Mayo).

***

Istorya ra say nag-ayo sa ilang gipasigarbo nga ayuda sa mga drayber sa mga sakyanang pamasahero, mag-uuma, mangingisda ug labing kabos nga mga pamilya:

- Katunga pa ang nahatag sa ?2.5 bilyones nga fuel subsidy lima ka buwan human gilusad ang programa sa Land Transportation Franchising and Regulatory Board ug Department of Agriculture; ug

- Wa pa kasugdi sa Department of Social Welfare and Development ang pag-apud-apod sa ayuda sa labing kabos nga mga pamilya.

***

Ang pait nga kamatuoran mao nga gawas sa kalangay nagkayamukat ang Pantawid Pasada (bisan ikatulo na ning hugna sa programa) kay di makiangayon ang mga panginahanglan. Dakong kahigayonan nga mas magkaguliyang ang ayuda kon i-agi na sab sa mga politiko nga mopalabi na sab sa ilang mga dumadapig, bahala nang mas tabanganan nga gidudahang mga kaatbang.

Sa pikas nga bahin, kon suspensuhon ang excise tax, diha-diha dayon maibanan ang bug-at nga palas-unon sa mga motorista, kapugngan ang uminto sa plitehan ug dugang pagsaka sa presyo sa palaliton. Gawas nga way gasto sa pag-apud-apod wa pa g’yuy kahigayonan sa pag-bolsa sa ayuda.