Gawas nga di mobarato momahal pa
Nakadungan nako og pamalit sa merkado sa Consolacion ang hamtong babaye nga, pareha nako, nilibot una sa tanang stalls sa pamasin nga may mamaligyaay nga wa pang kapa-uminto sa presyo. Pero nasagmuyo mi. Haskang dakoa na sa layat sa presyo sa tanang inadlaw’ng panginahanglan.
Wa lang tuyoa nga nakatuaw siya nga, “Maayo unta nga palingkuron na nila si Bongbong aron mobarato nang palaliton.” Di kong kabasol niya. Sa kadaghan sa sayop nga kasayuran nga nikatap sa niaging eleksiyon, mahimong nituo siya sa saad nga mobaratong bugas sa P20 kada kilo.
* * *
Mobanos na si President-elect Ferdinand Marcos Jr. sa Malakanyang karong udtong tutok sa Hunyo 30. Ang subo nga balita sa mga nituo niya mao nga gibakwi nang Marcos ang iyang saad sa kampanya. Pangandoy ra diay kuno to. Iya pang tun-an unsaon pagpatuman. Mangita pa og bag-ong binhi. O bag-ong teknolohiya. Aron mapa-ubsan ang gasto sa produksiyon. Ug madugangan sa produksiyon.
Sa laktod nga pagkasulti, tinuod ang mga pagduda sa mga ekonomista ug sa mga mag-uuma ug ubang suhito sa industriya sa bugas, wa siyang kahibawo sa iyang gipanulti.
* * *
Gawas nga di mobarato ang bugas ubos sa pamunoang Marcos, mahimong mo-uminto og P6 kada kilo karong tuiga: Ang kinabaratohang bugas humay nga tag P38 kada kilo presyohan na og P44; ug ang well-milled rice nga tag P42 ang kilo mahimo nang P48.
Ang nihimo sa banabana di ang mga kaatbang ni Marcos. Kon dili ang mga tagduma sa Department of Agriculture (DA). Nga magpabilin sa puwesto bisan kinsay itudlo ni Marcos nga bag-ong agriculture secretary.
* * *
Lahi sa saad ni Marcos nga hinulbot ra sa tumoy sa iyang buhok, dunay sukaranan ang pasidaan sa DA sa pagmahal sa bugas humay: Kay hapit na ma-triple ang presyo sa abono sukad sa pag-ulbo sa gubat sa Ukraine, nisaka ang gasto sa produksiyon sa tipasi ug motidlom ang produksiyon sa bugas humay.
Kalikayan lang ang pagmahal ug kanihit sa bugas humay karong tuiga kon sundon ni Marcos ang rekomendasyon sa DA: Paghatag og dinalian nga fuel ug fertilizer subsidy sa mga mag-uuma; o pag-import dayon og dugang bugas humay gikan sa Thailand, Vietnam ug India.
- Latest
