Laing pamakak ni Marcos Jr.
Duha ang buslot sa pangangkon ni President-elect Ferdinand Marcos Jr. nga nakatabang siya pagsulbad sa krisis sa lana sa 1973, nga gipadala kuno siya sa iyang amahan uban ni Energy Minister Geronimo Velasco pagkumbinser sa OPEC pagpaluag sa mga lagda sa ilang pagbaligya og lana sa Pilipinas:
- Una, di pa energy minister si Velasco sa 1973, natudlo siya sa katungdanan dungan sa pagkatukod sa Ministry of Energy niadtong 1979; ug
- Ikaduha, bisan gisul-oban pa tingalig higanteng kurbata di matago sa Saudi Arabia ug ubang sakop sa OPEC nga 16 pa siya.
***
Wa hisguti ni Marcos Jr. pero mas masabtan tingali ang kalibotanong krisis sa lana sa 1973 kon atong hinumdoman nga nanukad ni sa pagdumili sa Saudi ug OPEC sa pagbaligya og lana ngadto sa Estados Unidos ug ubang mga nasud nga nisuporta sa Israel sa Yom Kippur War.
Ang gubat sa Israel batok sa Egypt ug Syria, nga gitawag sab nga Fourth Arab-Israeli War, nilungtad lang og 19 ka adlaw (Oktubre 6-25, 1973) pero niresulta sa 300% nga uminto sa presyo sa lana ug nakatay-og sa kalibotanong ekonomiya.
***
Bisan si Ferdinand Marcos Sr. nisukwahi sa pangangkon sa iyang anak sa pagtuki sa presyo sa lana atol sa diskurso sa ikapitong anibersaryo sa Philippine National Oil Company niadtong Disyembre 11, 1980:
“We had to send, first, Minister (Carlos) Romulo; then, the First Lady (Imelda Marcos). In 1974, when not even Minister Romulo could mollify the Saudi Arabian government, the First Lady had to go to England to see the King who was ailing.”
***
Wa maghisgot si Marcos Sr. nilang Geronimo ug Marcos Jr. Gisaling-it ni Marcos Jr. nga duna siyay papel pagsulbad sa krisis sa lana sa 1973 aron pagpasalig nga takos siyang makisulti sa OPEC karon aron kalaslasan ang presyo sa lana sa Pilipinas.
Lisod kumbinsihon ang OPEC nga nagpahimus sa higanteng ginansiya sa kamahal sa lana, nga ni-isnab sa awhag ni US President Joe Biden pagdugang sa ilang produksiyon aron di na mosulbong ang presyo. Mas lisod ang trabaho kon sagolan og wa kinahanglang pamakak. Aron lang pagpaburot sa importansiya sa politiko nga kumbinsidong fake news ang nakapadaog niya sa niaging eleksiyon.
- Latest
