Pipila sa mga rason nganong ang Finland ang labing malampuson sa kampanya batok sa fake news samtang ang Pilipinas maoy usa sa labing inutil nga biktima nga ang niaging piniliayng presidensiyal gidaog sa padaghanay og sayop nga kasayuran:
• Ang gobyerno sa Finland maoy nangu sa kampanya batok sa fake news, samtang ang pamunoan ni Presidente Rodrigo Duterte gidudahan nga maoy nipalambo sa troll farms pinaagi sa Presidential Communications Operations Office (PCOO) ug ubang ahensiya sa gobyerno;
* * *
• Ang frontliner sa kampanya batok sa fake news sa Finland mao ang mga magtutudlo sa kindergarten, samtang ang mga libro sa kasaysayan sa Pilipinas nagdumili pagtuki sa kabangis ug kakawatan sa diktadura ni Ferdinand Marcos Sr. ug ang sunod nga kalihim sa edukasyon mao ang usa sa labing nabuhong sa sayop nga kasayuran;
• Nagtukod ang gobyerno sa Finland og dugang libraries aron pagdasig sa mga estudyante ug katawhan sa pagbasa og mga libro, samtang ang mga eskuylahan sa Pilipinas nipagamay sa libraries tungod sa kanihit sa classrooms (maong di ikahibung nga ang Finland ang numero uno ug ang Pilipinas ang iwit sa kalibotanon nga mga pasulit pagsukod sa reading comprehension);
* * *
• Nitabang ang gobyerno sa Finland pagpalambo sa media organizations isip labing kasaligan nga mga tinubdan sa kasayuran (labaw sa Tiktok, Facebook, ug YouTube), samtang ang pamunoan ni Presidente Duterte nagsige og pakauwaw ug panggukod sa media organizations ug way gihimo sa pagpatigbabaw sa hustisya sa mga sakop sa media nga gipamatay; ug
• Ang gobyerno sa Finland, imbes motagsa-tagsa og panghimakak sa kada sayop nga kasayuran, nidasig sa katawhan sa pagpatigbabaw sa ilang national identity nga gipasikad sa tawhanong katungod ug sa balaod, samtang ang gobyerno sa Pilipinas niapil og kutaw sa panghunahuna sa katawhang Pilipinhon pinaagi sa paglubag sa nasudnong kasaysayan (nga si Lapu-Lapu taga Mindanao ug di Oponganon, nga paraiso ang diktadurang Marcos, nga si Marcos di berdugo kon dili nasudnong bayani diay ug uban pang mga patuo-tuo) maong 31 milyones nipili niadtong Mayo 9 og konbiktadong wa ka-file og income tax return ug anak sa konbiktadong kawatan ug anak sa gipasanginlang nilaktod pagluba sa kaliboan ka kinabuhi nga mahimong ipadakop sa International Criminal Court bisan unsang orasa.