Akong istorya ni Tricia Robredo
Nabantayan nako nga mas interesado ang mga nanambong sa among mga pulungpulong para nilang Bise Presidente Leni Robredo ug Senador Kiko Pangilinan nga among gisugdan sa mga sugilanon nga giasoy sa mga tawo nga direktang nakasinati sa talagsaon nilang kaligdong ug katakos.
Sama sa sugilanon nilang Joel Gortina, Sugbuanong electrician, ug 40 ka kaubanan nga taga Sugbo, Bohol, Negros ug Leyte nga nawad-an og trabaho ug natanggong sa Manila sa pagsugod sa lockdown sa COVID-19. Nga tungod sa tabang sa Office of the Vice President gisagop sa La Salle Araneta.
* * *
Maong nisanong dayon ko sa imbitasyon ni Nick Tajale, usa sa labing aktibo nga nangu sa mga boluntaryo nilang Leni ug Kiko sa Lapu-Lapu City, pagtambong sa ilang pakigtagbo ni Dr. Tricia Robredo gahapon. Sa pamasin nga makabati og dugang mga sugilanon gikan sa ikaduhang anak sa bise presidente.
Pagsud namo sa Fons Barbecue, nga nangalimyon na sa mga putahe sa uwahi nga pamahaw o sayo nga paniudto para sa tanang nanambong, namalihug si Nick nako ug sa akong asawa nga maoy motapad ni Tricia.
* * *
Pag-abot ni Tricia kuyog sa daghang kamera, hilom nga nibalhin og lamesa ang akong asawa. Mosunod unta ko pero naikog pagkakita nga way ka-istorya si Tricia. Kay silang Nick ug ubang tagduma daghan pang giatiman.
Maong bakikaw kong nangutana unsay tambal sa pagaw sa iyang inahan ug unsang orasa siyang nimata para sa sayong flight para Mactan. Labihang sadyaa sa mga boluntaryo ug labihang hinaya sa iyang tingog. Masulub-on kong motaho nga wa koy nasabtan sa iyang tubag.
* * *
Pero duna koy istorya ni Tricia. Dihang gitanyagan namong Nick sa lechong baboy, nitubag nga di siya mokaon og karne pero motilaw sa panit. Gisul-ob niyang plastik nga guwantis samtang gihukaran nako sa hiniwang panit. Nangutana siya giunsa paghimo ang puso pero wa mangayo. Nikuha siya og plastik nga kutsara para sa mangga.
Pagkataudtaod, nananghid siyang motindog kay magpaletrato sa mga boluntaryo sa nagkalainlaing lamesa. Nakit-an nako sa iyang plato ang natilok nga pikas sa mangga ug pipila ka gagmayng bukog (di diay panit ray akong nahatag). Kon sama kahapsay sa iyang plato ang pamunoan sa iyang inahan, kabulahan sa atong katawhan.
- Latest
