Pagpusgay sa ilusyon sa kahawod
Kada adlaw sa nahibiling mga adlaw sa kampanya, ang Sugbuanon for Leni-Kiko mohimo og miting de avance sa nagkalainlaing mga barangay sa Cebu City nga ilang giduma. Di sayon ang ilang gimbuhaton. Pero tungod sa kadaghan ug kadasig sa mga boluntaryo, mas gaan ang kataposang hunat sa kampanya. Nakatambong ko sa tulo ka nagkadungan nilang kalihokan sa Neneng Compound gym sa Barangay Tisa:
- Libreng konsultasyon ug tambal sa Doctors for Leni-Kiko Cebu;
- Libreng serbisyong legal sa Lawyers for Leni; ug
- Job fair sa mga negosyante nga nagsuporta nilang Leni ug Kiko.
***
Ang Doctors for Leni-Kiko labihan kakugihan. Gikan sa Tisa sa buntag, nitungas sila sa bukirang Barangay Guba sa hapon aron pagpadayon paghatag og libreng konsultasyon ug mga tambal sa labing nagkinahanglan nga mga pasyente. Karong adlawa gitakdang moadto sila sa Dumanjug ug Barili sa kasadpang Sugbo.
Sa mosunod nga mga adlaw alagaran sab nila ang labing kabos nga mga pasyente sa Lapu-Lapu City ug Consolacion. Kay nag-atiman man gihapon sa naandan nilang mga pasyente ug trabaho, weekends ra sila maka-boluntaryo sa tibuok adlaw ug magabii ra sa weekdays.
***
Sa kataposang ihap, kapin sa 400 na ka doktor ug healthcare workers sa Sugbo ang niboluntaryo para nilang Leni ug Kiko. Apil sa labing dasig nga nitabang ang mga nagtrabaho sa mga ospital ug mga ahensiya sa gobyerno.
Nakamatngon sa malipayong problema sa ilang kadaghan dihang napugos sa pagbalibad sa pipila sa kapin sa gatos nga niboluntaryo isip medic sa Ceboom! Grand People’s Rally sa Mandaue City niadtong Abril 21.
***
Human sa ilang kalihokan sa Tisa gahapon sa buntag, ang Sugbuanon for Leni-Kiko nagpahigayon sa mabulukon nga Colon Walk sa downtown sa Cebu City. Nagpundok sila sa E-Mall, naghimo og duha ka grupo ug nagbaktas sa duha ka sidewalk sa labing karaan nga karsada sa Pilipinas.
Samtang ang ubang mga boluntaryo nag-house-to-house, nag-pulong-pulong ug nagbansay-bansay na sa watchers nga idestino sa mga presinto sa adlaw sa piniliay. Ang kakugi, kamamugnaon ug determinasyon sa mga boluntaryo nilang Leni ug Kiko maoy ilang alas nga di maambasan sa kuwarta ug makinarya. Ug mao karon ang labing nakahulga sa ilusyon sa kahawod sa tradisyonal nga mga politiko.
- Latest
