^

Opinion

Paghunong og subay sa mga kaso

ARANGKADA - Leo Lastimosa - The Freeman

Atubangan sa pagsulbong sa bag-ong mga kaso sa COVID-19, kansang kapaspas wa pa sukad masinati sukad sa pagsugod sa pandemya ug gidudahan nga tungod na sa mas mananakod nga variant sa Omicron, nakakita og sulbad ang pamunoan ni Presidente Rodrigo Duterte: Ibanan ang testing.

Ang ubang kanasuran nihingusog sa ilang panagang sa Omicron pinaagi sa pagpalapad sa contact tracing ug PCR testing. Pero ang Pilipinas nipili sa sukwahi nga direksiyon: Pagsagang sa Omicron di pinaagi sa pagbadlong sa tinakdanay kon dili sa paghunong pag-ihap sa bag-o nga mga kaso.

* * *

Gipahibawo sa Department of Health ang bag-ong lagda nga di na ipaubos sa PCR testing ang close contacts sa positibong mga kaso nga wa mopakita og mga timaan sa sakit ug di na sab himuon ang contact tracing kay nagsugod nang community transmission.

Duha ka tuig nang community transmission sa COVID-19 sa Pilipinas ug ubang kanasuran. Ang ubang kanasuran naningkamot sa pagsubay sa tinakdanay aron mabadlong sa di pa makakatap sa mas daghan. Kita ray nakahunahuna nga pasagdan ang tinakdanay pero di na subayon kinsa ang bag-o nga mga natakdan.

* * *

Ang Omicron sama sa ubang variants sa COVID-19 di makita sa mata. Labing epektibong paagi sa pagtultol kinsa ang mga natakdan ug asa ang daghang tinakdanay pinaagi sa pagpalambo sa PCR testing ug agresibo nga pagsusi sa tanang close contacts nga posibleng natakdan sa positibong mga kaso.

Sa pag-iban sa testing, morang gibutaan sa gobyerno ang kampanya batok sa COVID-19. Sama rang gisugo nilang tanan pagpiyong sa atong mga mata aron masulbad ang pandemya.

* * *

Pero napamatud-an na sa makadaghan uyamot nga higayon nga ang pag-iban sa testing ug contact tracing makapasamot sa problema. Mas molapad ug mopaspas ang tinakdanay. Ug mas mas makalilisang ang pagsulbong sa bag-ong mga kaso.

Sa makausa pa nalupig ang mga eksperto sa kahimsog sa retiradong mga heneral, mga politiko ug mga negosyante nga naglibot sa presidente. Gipatigbabaw na sab ang pagdaginot sa kuwarta para sa testing. Bahala na kon napakita sa nangaging kasinatian nga moresulta sa mas dakong alkanse sa pag-awas sa mga ospital, pagdaghan sa mga mangamatay, ug paghagsa na sab sa mga panginabuhi ug sa ekonomiya.

COVID-19

OMICRON

Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with
no session for state
no session for code
no session for id_token
no session for user