Tihik gihapon sa testing
Gipaabot nga mabanhaw na sab ang lalis sa mga espesyalista sa Department of Health (DOH), ang tinuod g’yud unta nga manalipod sa kahimsog sa publiko ug ang mga sinaligan ni Presidente Rodrigo Duterte nga maoy responsable nganong iwit ang Pilipinas sa tanang kalibotanong sukdanan sa pagduma sa pandemya sa COVID-19:
Ang mga propesyonal sa DOH niawhag nga palapdan ang PCR testing aron mabantayan dayon kon makasud nang Omicron; pero ang mga nag-alirong sa presidente nidangop sa ilang naandang linya nga mahal ang PCR testing mao nga kinahanglan nga pilion ra.
* * *
Nabalaka ang DOH sa pagtidlom sa gidaghanon sa inadlaw nga PCR tests sa molecular laboratories sa tibuok nasud. Kapin sa 35 mil ka tests ra ang gi-report sa DOH niadtong Sabado, Disyembre 4, sobra lang og diyutay sa 1/3 sa gipasalig sa Malakanyang nga 90,000 ka tests kada adlaw.
Pero ang kaubos sa positivity rate (menos sa 5% sa ika-22 nga sunudsunod nga adlaw) nagtimaan nga nakontrolar nang tinakdanay sa COVID-19 sa tibuok nasud. Mao na ang lagda sa World Health Organization (WHO) sa wa pa ang Omicron.
* * *
Ang Omicron, sama sa orihinal nga kagaw sa COVID-19, di makita. Matultolan lang ang tinakdanay pinaagi sa pinalapdan nga PCR testing. Nga para sa DOH labihan kamapuslanon batok sa Omicron. Kay mabantayan dayon sa pagsugod pa lang sa pa makatakod sa mas daghan.
Pero ang mga sinaligan sa presidente ganahang magdaginot sa gasto sa PCR testing. Mas ganahan silang mobubo og binilyon ka pesos sa nangalisbo nga mga transaksiyon sama sa pinalabi sa presidente nga Pharmally Pharmaceutical Corp.
* * *
Mapalapdan lang ang PCR testing kon hingusgan ang contact tracing. Kay di mahimong mangatang sa kadalanan ang taga laboratoryo aron pagpanguha og swab samples. Pero ang mga sinaligan sa presidente di sab ganahan nga modugang og gasto sa contact tracing.
Maong si contact tracing czar Benjamin Magalong ang unang nikumpisal nga mao ni kinahuyangan nga bahin sa kampanya. Kay mga sakop sa pamilya sa positibong mga kaso mao ray gi-trace nga close contacts. Kon padayong isnabon sa presidente ang tinuod nga makamao sa DOH, manguros na lang tang daan sa sunod nga sulbong inig panghasi sa Omicron.
- Latest
