Ikatulo nga pagpakabuang
Wa gyod maleksiyon ang administrasyong Presidente Rodrigo Duterte. Ang usa ka bilyon ka pesos nga fuel subsidy para sa mga drayber sa jeepneys nga naigo sa kapin sa duha ka buwang sunudsunod nga pagsaka sa presyo sa lana gipasubay sa ruta nga kaduha na nagkaguliyang.
Ang unang duha ka bersiyon sa fuel subsidy niadtong 2018 ug 2019 wa kapahimusli sa kinabag-an sa mga drayber tungod sa taphaw nga pagpatuman. Pero ang ikatulong bersiyon karong tuiga gitugyan gihapon sa Land Transportation Franchising and Regulatory Board (LTFRB), ang ahensiyang responsable sa bulilyaso.
* * *
Labing dakong problema sa LTFRB, nga wa masulbad hangtod karon, mao nga wa silay lista sa mga drayber nga hatagan sa fuel subsidy. Ang narehistro sa ilang ahensiya maong operators nga niadtong 2018 ug 2019 ug posibleng mao gihapoy himuon karong tuiga nitipig sa hinabang imbes ipasa sa mas nagkinahanglang mga drayber.
Way kalainan ang LTFRB sa katabang sa bay nga sa unang bagting ang telepono nitaon sa nagbagang plantsa sa iyang tuong dunggan, sa ikaduhang bagting sa walang dunggan ug sa ikatulong bagting iyang agtang na gyoy gipasoan.
* * *
Laing problema sa LTFRB, nga maoy hinungdan nga wa rang katunga sa beneficiaries ang nakakobra sa fuel subsidy sa 2018 ug 2019, mao nga ang operators nga nalista sa ilang ahensiya di na maoy aktuwal nga nanag-iya sa jeepneys.
Ang bag-ong mga tag-iya nga wa magtagad sa pagbalhin sa rehistro sa ilang ngan tungod sa, nakatag-an ka, kagubot sa burukrasya sa LTFRB naglisod og pangita sa ilang gipalitan kay namalhin na og puyo, ang uban gani nanglangyaw na sa ubang kanasuran.
* * *
Gitaho sa LTFRB nga na-depositohan nag P7,200 ang kada unit sa 78,000 card holders (sa way pagsulti nganong wa maapil ang 58,000 sa 136,000 ka jeepney franchise holders nga gipasaligan sa hinabang) ug P562 milyones sa P1 bilyones nga subsidy na ang nahatag. Makapaabot na tang daan nga ang pahibawo sundan sa sibaw nga naandang reklamo sa mga drayber nga maglaway lang sa tabang nga masangit sa operators.
Nagpalinguglingog ang pamunoang Duterte sa pasidaan ni Albert Einstein: Ang pagbalikbalik paghimo sa samang butang nga magpaabot og lahing resulta usa ka pagpakabuang.
- Latest
