Labihang sukoa nga nangiyugpos

Labihang sukoa ni Presidente Rodrigo Duterte sa pagpanghasi sa Chinese Coast Guard sa supply boats para sa Pilipinhong mga sundawo sa Ayungin Shoal sa West Philippine Sea nga igo lang nipasaka og diplomatic protest ang Department of Foreign Affairs (DFA) tungod sa insidente.

Kon tinuod ang kasuko nga gipadayag atol sa iyang diskurso sa virtual ASEAN-China Summit nga gipatawag ni Chinese President Xi Jinping niadtong Lunes, Nobyembre 22, wa hatagi sa iyang administrasyon og igong importansiya ang pagpanghasi nga gipasagdan lang ang mga barko sa China sa pagpabilin sa Ayungin.

 * * *

Labihang sukoa ni Presidente Duterte sa pagbabag ug pag water cannon sa tulo ka barko sa Chinese Coast Guard sa duha ka supply boats sa Pilipinas niadtong Nobyembre 16 nga igo lang gipabalik ang supply boats ngadto sa ilang base sa mainland sa Palawan.

Labihang sukoa sa presidente sa kahawod sa mga barko sa China nga igo lang giayo ang naguba nga supply boat sa wa pa pabalika ang samang duha ka supply boats ngadto sa Ayungin Shoal gahapon sa udto, Nobyembre 23, pito ka adlaw human sa pagpanghasi.

 * * *

Labihang sukoa ni Presidente Duterte sa pagpanghasi sa Chinese Coast Guard sa supply boats nga igo lang nagdala og lab-as nga suplay sa pagkaon para sa Pilipinhong mga sundawo sa BRP Sierra Madre nga gituyo pagsangad sa Ayungin Shoal nga gituman sa iyang administrasyon ang kundisyon nga gipahamtang ni Huang Xilian, ang Chinese ambassador to the Philippines sa ilang panagsulti ni Defense Secretary Delfin Lorenzana:

Nga way navy ni coast guard escorts ang supply boats.

 * * *

Labihang sukoa ni Presidente Duterte sa pagpanghasi sa Chinese Coast Guard nga gipasagdan sa iyang administrasyon nga magpabilin ang mga barko sa China sa Ayungin Shoal, gani nisikit sa distansiya nga 45 ra ka metro sa duha ka supply boats sa Pilipinas.

Labihang sukoa sa presidente nga ang iyang diskurso sa pagpadayag sa kasuko labihan kamatinahuron nga wa gani mangahas pagsukwahi sa pangangkon sa tigpamaba sa Chinese Foreign Ministry nga si Zhao Lijian nga ang Chinese Coast Guard igo lang nipatuman sa ilang mga balaod ug nanalipod sa ilang sobereniya kay nag-trespassing ang atong supply boats sa ilang teritoryo.