Pakitaay og braso sa lana
Kon nakapatubil ka sa imong sakyanan karong buntag, usa ka sa labing unang nakapahimus sa dakong laslas sa presyo sa lana sa ikatulong sunudsunod nga semana: P1.20 kada litro sa krudo (nabawi ang wa pagkaapil sa laslas sa niaging semana); 85 sentabos kada litro sa gasolina; ug P1.30 kada litro sa kerosene.
Wa matinuod ang gikabalak-ang pagsige og sulbong sa presyo sa lana hangtod sa kataposan sa tuig tungod sa kumbinasyon sa pagsulbong sa bag-ong mga kaso sa COVID-19 sa Uropa ug pagpakita sa braso sa higanteng mga ekonomiya.
* * *
Unahon nato ang pagsulbong pagbalik sa tinakdanay sa COVID-19 sa Western Europe (nga gikahibudngan kay abunda ang bakuna) ug Eastern Europe (nga wa kahibudngi kay luya ang pamakuna). Nadungan sa pagdaghan sab sa bag-ong mga kaso sa pipila ka bahin sa China.
Nag-lockdown nang pipila ka nasud sa Uropa ug naigo nga mga probinsiya sa China. Nga nagkahulogan sa menos nga mga biyahe ug pagtak-op sa mga pabrika. Nga nagkahulogan og mas ubos nga konsumo sa lana. Ang gipaabot nga mas ubos nga demanda maoy nakapatidlom sa presyo.
* * *
Gilaoman nga mas makapatibugsok sa presyo sa lana sa merkado sa kalibotan mao ang talagsaon nga panaghiusa sa Estados Unidos ug China sa pagpahinumdom sa OPEC nga gipangulohan sa Saudi Arabia ug sa OPEC Plus nga gipangulohan sa Russia kinsa ang tinuod nga hawod.
Human giisnab sa Saudi ug Russia ang awhag ni US President Joe Biden nga dugangan ang kalibotanong suplay sa lana, nisuwat si Biden sa China ug ubang kanasuran nga magdungan og pagawas sa ilang reserba nga suplay sa lana aron mabaraw ang pagsulbong sa presyo.
* * *
Human sa virtual summit nilang Presidente Xi Jinping ug Biden, nipahibawo ang China nga mopagawas sa ilang oil reserves. Nisunod dayon ang Estados Unidos pagpahibawo sa pagpagawas sab sa kabahin sa 600 milyones ka baril sa lana nilang reserba. Gipaabot nga mosunod ang India, Japan, ug South Korea.
Temporaryo ra hinuong alibyo sa pagpagawas sa mga reserbang lana. Kon magpabiling limitado ang suplay sa OPEC ug OPEC Plus atubangan sa inanayng pagtimbakuwas sa kalibotanong ekonomiya gikan sa pandemya, mahimong mobalik pagsulbong ang presyo sa lana sunod tuig.
- Latest
