Pagtabon sa awas sa mga ospital
Magkayamukat ang administrasyon ni Presidente Rodrigo Duterte matag sulbong sa mga kaso sa COVID-19 sa dagkong sentro sa populasyon --sama sa Metro Cebu ug Metro Manila-- kay bilib sa ilang kaugalingong mga numero. Bisan pa kon ang maong mga numero wa na motakdo sa mga panghitabo.
Maong di na sab sila andam ning labing uwahing pagsulbong sa mga kaso sa Sugbo. Kay sa ilang ihap, daghan pang bakante sa mga ospital. Bisan pa kon pila na ka adlaw nga may naglinyang mga ambulansiya pagpaabot og bakanteng mga kuwarto para sa ilang mga pasyente.
* * *
Pero di na nila katabonan ang pag-awas sa mga ospital. Kay, salamat sa nagpakabana nga mga Sugbuanon, nakuhaan og mga letrato nga nikatap dayon online niadtong Lunes sa gabii ang publiko ug pribadong mga ospital nga namalibad og mga pasyente.
Ambot moinsistir pa ba ang Department of Health (DOH) ug lokal nga mga opisyal nga mas daghan gihapong bakanteng COVID-19 beds kay sa bag-ong mga pasyente. Nga nabantang na mang oxygen tanks nga gikutay sa mga pasyente sa sidewalks, hallways, ug pribadong mga sakyanan nga nagparada sa dan.
* * *
Sa listahan sa DOH sa 1,722 ka COVID-19 beds sa 37 ka ospital sa Sugbo, 1,036 (60%) ra ang okupado ug duna pay 686 nga bakante.
Gilista sab ang 17 ka ospital nga giisip pang safe (wa kaabot og 60% nga okupado); tulo ang moderate (60% ngadto sa 70% nga okupado); lima ra ang high risk (70% ngadto sa 85% nga okupado); ug siyam ra ang critical (kapin sa 85% nga okupado).
* * *
Samang listahan niila nga safe ang Chong Hua Hospital Fuente, nga usa sa naletratohan nga niawas nang mga pasyente, kay 66 (40%) ray okupado sa 163 ka higdaanan ug 97 ang bakante: 53% ra sa ICU beds ug 39% ra sa isolation beds ang okupado.
Tagduma sa mga ospital nitiyabaw nga dugay ra silang napuno. Pero di silang kapahibawo sa publiko. Kay dihang nitug-an sila sa tinuod sa pagsulbong sa mga kaso sa niaging tuig, gisabonan sila sa DOH ug gipasidan-an sa dakong opisyal sa gobyerno. Kansang nag-unang misyon mao ang pagpahumot sa ilang kaugalingon, bahala nang pandemya.
- Latest