Nganong buta ta sa Delta

Ang maayong balita mao nga madoble na ang kapasidad sa Philippine Genome Center (PGC) sa University of the Philippines (UP) sa pag-ila sa bag-ong variants nga nakasud na sa Pilipinas, apil na ang gikahadlokan nga Delta variant gikan sa India nga mas mananakod ug mas makamatay.

Gikan sa limitadong kapasidad sa genome sequencing sa 750 ra ka samples kada semana, gipaabot nga makasusi na og 1,500 ka samples kon mangabot ang bag-ong mga makina nga ibutang sa UP sa Kabisay-an ug Mindanao. Wa hinuon maklaro kanus-a mangabot ang mga makina.

 * * *

Ang di maayong balita mao nga mahimong uwahi na ang tanan. Tungod sa mga limitasyon sa PGC, naabtan og 21 ngadto sa 50 ka adlaw una nakit-i ang 11 ka kaso sa Delta variant sa Kabisay-an, Mindanao, ug Luzon nga pulos wa kabiyahe sa gawas sa nasud.

Kutob na lang ta sa panghinaot nga ang 11 ka pasyente, nga namatyan na og duha ug giisip ra nga ordinaryong mga kaso sa COVID-19, wa makapanakod sa mas daghan ug wa makasugod sa gikahadlokan nga community transmission na sa Delta variant.

 * * *

May laing buslot nga nitumaw sa pahibawo ni Manila Mayor Isko Moreno nga na-trace nila ang 36 ka close contacts sa duha ka kaso sa Delta variant sa distrito sa Pandacan ug usa nila napamatud-an nga positibo sa COVID-19.

Nganong karon pa man gihimo ang contact tracing nga tulo ka semana na human sa posibleng tinakdanay? Tungod ba kay naalarma na sa Delta? May aktuwal nga contact tracing pa ba sa close contacts sa ubang mga kaso sa COVID-19?

 * * *

Naigo sab sa limitasyon sa PGC ang Sugbo ug Central Visayas. Tulo pa ka semana gikan karon una mahibaw-an kon, simbako, Delta variant na bay hinungdan sa pagsulbong sa bag-ong mga kaso sa Sugbo, Bohol, ug Negros Oriental.

Kon tinuod ang pasangil sa mga doktor sa Sugbo nga gibalibaran sa PGC ang samples sa Central Visayas kay giuna ang samples gikan sa Metro Manila, magpabilin ta nga buta kon wa ba masudli sa Delta variant niadtong mga semana nga gipaluagan ang swabbing ug isolation protocols sa incoming international flights sa Mactan-Cebu International Airport.