Di na mamuhi sa gahom

Dihang gireport sa World Bank (WB) ang krisis sa edukasyon sa Pilipinas kay 80% sa mga estudyante wa makat-on sa angay nilang makat-onan, nidemanda si Education Secretary Leonor Briones nga mangayo og pasaylo ang WB kay bahaw ang kasayuran ug wa mananghid sa gobyerno sa wa pa ipublikar ang report.

Wa magtagad si Briones pagpasabot unsay gihimo sa Department of Education (DepEd) sukad nangiwit ang Pilipinas sa tulo ka sunudsunod nga kalibotanong pagtuon sa 2018 ug 2019, gipalabi niyang naandan sa iyang kaubanan sa pamunoan ni Presidente Rodrigo Duterte: Paghudlat sa mensahero.

 * * *

Dihang gibanhaw ni Senador Antonio Trillanes ang mga pasangil nga niburot og P6.6 bilyones ang amahan ug igsuon ni Senador Bong Go tungod sa mga proyektong nakuha sa mayor pa si Duterte sa Davao City hangtod nga nibanos sa Malakanyang, gisunod ni Go ang gihimo ni Briones pagsumbalik nga bahaw nang kasayuran.

Bisan may findings ang Commission on Audit (COA) nga nidason sa pasangil ug bisan way gihimo sa Ombudsman sa giingong mga anomaliya sa mga proyekto sa mga Go, gipalabi ni Go ang pagpakauwaw sa namasangil.

 * * *

Dihang nisugyot si Bise Presidente Leni Robredo nga sundon sa Davao City ang gihimo sa Cebu City sa pagpaubos sa mga kaso sa Covid-19, gisalikway siyang Mayor Sara Duterte-Carpio nga unya na manaway kon magkaatbang sila sa piniliayng presidensiyal sunod tuig.

Bisan Davao City nay bag-ong epicenter sa Covid-19 sa Pilipinas ug bisan wa manaway si Robredo, ang mayor nisunod sa naandan sa iyang amahan sa pagtunglo ni bisan kinsang mangahas pagsukwahi niya.

 * * *

Dihang gidasonan ni Senador Manny Pacquiao ang pag-angkon ni Presidente Duterte nga nisamot ang pangurakot sa iyang pamunoan, gihagit siya sa presidente sa paghingan og mga ngan. Dihang gidawat ni Pacquiao ang hagit, gibaraw sa Malakanyang si Pacquiao nga bahaw ang iyang kasayuran.

Bahaw o bag-o man ang mga pasangil, nagsalig silang Presidente Duterte ug kaubanan nga di madutlan sa balaod. Ug kay posible mang imbestigahon sa International Criminal Court (ICC) sa karaang crimes against humanity sa Davao ug tibuok Pilipinas, ug mameligro mang mangapriso kon motabang sa imbestigasyon ang sunod nga administrasyon, nakahukom ang presidente nga di mamuhi sa gahom.