_freeman
^

Sunod ikabangga ni Duterte sa ICC

ARANGKADA - Leo Lastimosa (The Freeman) - June 16, 2021 - 12:00am

Samtang giinsulto ug gibinastosan ni Presidente Rodrigo Duterte ang mga sakop sa Commission on Human Rights (CHR) ug samtang gihudlat sa iyang mga alyado sa Kongreso nga laslasan ang budget sa CHR ngadto na lang sa P1,000 sa tibuok tuig, nahimong bisita sa CHR sa Pilipinas ang opisyal nga dako og papel sa pagtakda sa kapalaran sa presidente.

Ang opisyal maoy momatuod sa mga pasangil sa crimes against humanity batok sa presidente ug iyang mga sinugo sa kampanya batok sa ilegal nga drugas nga niresulta sa kamatayon sa kaliboan.

 * * *

Moasumir karong adlawa ang bag-ong prosecutor sa International Criminal Court (ICC). Si Karim Khan ang mopuli sa bag-ong niretiro nga si Fatou Bensouda kinsa pormal nga niawhag sa Pre-Trial Chamber sa ICC sa pag-imbestigar nilang Presidente Duterte ug kaubanan.

Tungod sa iyang kasuod sa CHR sa Pilipinas dunay ideya si Khan sa kaso nga iyang saw-on kon aprobahan sa ICC ang rekomendasyon ni Bensouda, kinsa nakumbinser nga nakahimo si Duterte sa bangis nga mga krimen human sa tulo ka tuig niyang pasiuna nga imbestigasyon.

 * * *

Unsay gihimo ni Khan sa Pilipinas niadtong 2018, samang tuig sa pagsugod sa imbestigasyon ni Bensouda? Si Khan ang trainer ug course director sa Best Practices in Human Rights Investigations nga gipasiugdahan sa CHR.

Sa ato pa, mahimong tulo ka tuig nang nahibaw-an ni Khan ang pagpanggukod nga nahiagoman sa CHR tungod sa ilang pagtabang sa ICC ug sa ilang kaugalingong mga imbestigasyon sa extrajudicial killings nga gipasangil sa mga polis ug ubang mga sinugo sa presidente.

 * * *

Di sab katabang ni Presidente Duterte ang iyang bisyo sa pagpanghudlat ug pagpanghagit sa mga nasud, apil nang European Union (EU), nga nangahas sa pagsaway sa pagpanglaktod sa balaod sa iyang kampanya batok sa ilegal nga drugas.

Kay si Khan banggiitang abogado sa international law sa Britanya, haligi sa EU sa wa pang Brexit. Ug si Khan, sama ni Bensouda, di mokurog ni Duterte kay maoy nagsusi sa pasangil sa war crimes sa Iraq, beterano sa mga kaso sa ICC sa Kenya, Libya, ug Sudan ug napamatud-ang determinado pagsilot sa mga responsable sa bangis nga mga krimen ug paghatag og hustisya sa mga biktima.

COMMISSION ON HUMAN RIGHTS
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with