Misteryo sa kakuwang sa swab tests
Tungod sa pagsulbong sa mga kaso sa COVID-19 sa iyang probinsiya, nipabor si Gobernador Art Yap sa mga rekomendasyon sa pag-lockdown sa Tagbilaran City ug siyam ka lungsod nga kinadaghanan og bag-ong mga kaso. Tungod sa mas daghang kaso sa COVID-19 sa Dumaguete City ug ubang bahin sa Negros Oriental, gitun-an sa lokal nga mga opisyal sa pagpahamtang og lockdown.
Tungod sa padayon nga pagsulbong sa bag-ong mga kaso sa COVID-19 sa unom nila ka probinsiya, ang Eastern Visayas Regional Inter-Agency Task Force nirekomendar na sa pag-lockdown sa tibuok rehiyon.
* * *
Way bisan usa sa mga tagduma sa kampanya batok sa COVID-19 sa Bohol, Negros Oriental ug Eastern Visayas nga naghisgot sa panagang sa tinakdanay sa COVID-19 nga napamatud-an sa nagkalainlaing kanasuran nga mas epektibo kay sa lockdown nga makapiang sa ekonomiya ug panginabuhi: Pagdugang sa swab testing.
Nga maoy rekomendasyon sa World Health Organization (WHO) sukad sa pagsugod sa pandemya kapin sa tuig nang nilabay. Mabadlong ang tinakdanay, mabuwag ang mga nataptan sa di pa makapanakod sa mas daghan ug matambalan dayong mga masakiton pinaagi sa: test, test, test.
* * *
Nga ambot unsay hinungdan kusganon nga gisupak sa pamunoan ni Presidente Rodrigo Duterte sukad pa sa niaging tuig. Niinsistir ang Department of Health (DOH) nga wa kinahanglana ug pag-usik-usik lang sa buhis sa katawhan ang mass swab testing.
Human sa pagsulbong sa bag-ong mga kaso sa Metro Manila niadtong Marso ug Abril karong tuiga, nipasalig si testing czar Vince Dizon nga palapdan ang testing ngadto sa 90,000 ka swab tests kada adlaw. Pero hangtod karon wa mapatuman.
* * *
Way taga Malakanyang ni DOH nga nipasabot nganong katunga ra sa gisaad ni Dizon ang aktuwal nga swab tests. Wa na gani maghisgot sa rapid antigen test kits, nga gidalidali og kompra ug gipasalig nga ipakatap dayon sa Metro Manila, kansang mga resulta ilang gisaad nga i-apil sa opisyal nga ihap sa inadlawng tests.
Mahimong mahuman na lang ang pandemya, sama sa misteryo sa kanunayng pagpaburot sa ihap sa recoveries ug pagpahiyos sa ihap sa nangamatay, di mapasabot ang kakuwang sa swab testing. Nakapait mao nga tungod sa kakuwang sa swab testing, mahimong kitay iwit nga makalingkawas.
- Latest
