_freeman
^

Paghinumdom ug pagkat-on

ARANGKADA - Leo Lastimosa (The Freeman) - June 13, 2021 - 12:00am

Wa masud sa akong hunahuna ang pagtimaan sa anibersaryo sa pagsugod og sibya sa DYAB, nga napawong uban sa tanang regional TV ug AM stations sa ABS-CBN kansang aplikasyon sa bag-ong prangkisa gibasura sa Kongreso sa niaging tuig, dungan sa ika-123 nga sumad sa Independence Day gahapon.

Pero napahinumdoman ko dihang gi-tag sa suking mga tigpaminaw sa mga letrato sa ilang pag-apil sa Grand Halad, Kapamilya Run ug ubang kalihokan sa DYAB sa nangaging katuigan. Di sayon ang paglingi pagbalik sa mga nahimo sa institusyon nga gipahilom sa berdugo sa Malakanyang.

***

Nalab-as sa akong hunahuna ang kabakikaw sa unang adlaw sa pagsibya sa Arangkada sa DYAB niadtong Hunyo 12, 1995. Duha ka oras ang programa pero tungod sa kahigwaos nahutdan na kog istorya human sa 30 minutos.

Maayo na lang nga nasawo sa kadaghan sa field reports sa DYAB Radyo Patrol. Kansang reporters lisod labwan sa ilang kadasig, kakugi, kapaspas, kaisog, kamamugnaon ug kaabunda sa labing importante nga mga balita sa kapolisan, kamerkadohan, kadalanan, kabaranggayan, non-government organizations, mga siyudad ug lungsod ug nasudnong mga ahensiya sa gobyerno.

***

Labing importanteng leksiyon nga akong nakat-onan gikan sa pagtrabaho sa DYAB mao ang kamapuslanon sa pagtinabangay. Bisan unsa kadagko sa gimbuhaton mogaan kon mas daghan ang molihok. Mas daghan ang matabangan kon manangpit sa mga organisasyon nga pareha og tinguha.

Maong hangtod karon di pa kalabwan ang kalapad ug kamalungtaron sa labing dakong piyesta sa libre nga mga pangalagad para sa labing nagkinahanglan atol sa Grand Halad sa Kapamilya kada Hunyo ug Nobyembre kada tuig.

***

Daghang salamat sa among mga tigpaminaw nga wa pa malimot sa DYAB. Ug hangtod karon padayon nga naghandom nga makabalik sa kahanginan. Kasagaran nila nagpabilin nga mapasalamaton sa mga balita, kalingawan ug pangalagad sa sibyaanan.

Mas dako ang among pasalamat. Tungod nila nadugangan ang among determinasyon sa pagtuman sa among mga trabaho sa labing maayong paagi nga among nakat-onan. Kinadak-an nga demalas mao nga ang mandato sa ABS-CBN management pagserbisyo sa Pilipino, imbes dasigon ug himuon nga sumbanan, nakahudlat na man hinuon sa mga nagtungkawo sa gahom nga nidangop sa tanang binastos nga maniobra aron pagtuok sa kagawasan sa pagpadayag.

leo_lastimosa@abs-cbn.com

ABS-CBN
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with