Panag-abot sa duha ka desperado

Sukwahi sa gipatuo nga kalig-on sa iyang mga baruganan, nga naumol ginamit ang kalantip sa iyang panghunahuna ug lapad nga kasinatian, si Presidente Rodrigo Duterte wa kasabot sa tinuod nga mga implikasyon sa iyang pagdapig sa pangangkon sa China sa pipila ka bahin sa West Philippine Sea (WPS).

Nga kinahanglan siyang magpalaban sa hapit tanang sakop sa iyang gabinete nga napugos sa pagdupa sa dakong kauwawan sa iyang pagkakak sa pagdawat dayon ni retired Supreme Court Senior Associate Justice Antonio Carpio sa hagit sa debate sa WPS gikan sa presidente.

 * * *

Wa kaha matagbaw sa pagdalidali og aleluya sa kasakto sa iyang baruganan nilang Foreign Affairs Secterary Teodoro Locsin Jr., Defense Secretary Delfin Lorenzana, Presidential spokesman Harry Roque, ug Presidential Legal Counsel Salvador Panelo, nagpalaban siya og laing alyado aron mo-abiba niya.

Pero ang ilang panag-abot ni kanhi Senate President Juan Ponce Enrile nakapabisto lang sa ka-desperado nilang duha: Ang presidente maminaw ni bisan kinsang mopabor niya; ug si Enrile mopahimus sa tanang kahigayonan nga makapadayag sa iyang panghunahuna sa bisan unsang isyu nga ang presidente na lang maoy interesado.

 * * *

Ang presidente mora og gamayng bata nga nisumbong sa iyang maguwang nga gipasanginlan siyang traydor sa paghatag og dakong importansiya sa talagsaon niyang kasuod ni Presidente Xi Jinping sa China.

Si Enrile labihan sab kaandam sa iyang ulog-ulog nga ang presidente maoy tinuod nga hawod sa foreign policy, nga siya ang magbuot unsaon pagduma ang problema sa WPS, ug nga kon motuman lang sa tambag ni Enrile nga di hagiton ang China mahapsay rang sitwasyon.

 * * *

Pero wa katago si Enrile sa nag-aliwaros niyang kahinangop sa panahon nga makita sa nasudnong telebisyon. Nitumaw ang karaan niyang taras, sa siya pay hawod sa Senado ug dihang siya pay berdugo sa diktadura ni anhing Ferdinand Marcos, sa pagsapaw og sulti labi na sa mga higayon nga nagkayuring ang presidente.

Ug wa siyang katago sa nag-alintabo nga pagdumot sa Estados Unidos: Kansang puti nga ayroplano niadtong 1989 maoy gituohan nga nakabadlong sa labing seryusong kudeta nga gilusad sa mga rebeldeng sundawo, kansang mga pangu gipasanginlan nga mga ginawongan ni Enrile, batok ni anhing presidente Corazon Aquino.