_freeman
^

Bahaw ug sayop nga ihap

ARANGKADA - Leo Lastimosa (The Freeman) - May 18, 2021 - 12:00am

Kapin na sa tuig human sa pagsugod sa pandemya, nagpabiling misteryo ang managlahing ihap sa mga kaso sa COVID-19, apil nang gidaghanon sa nangaayo ug nangamatay, sa local government units (LGUs) ug sa rehiyonal ug nasudnong mga buhatan sa Department of Health (DOH).

Nikumpisal si Health Undersecretary Maria Rosario Vergeire nga uwahi og duha ka adlaw ang mga numero nga gipagawas kada alas-4 sa hapon kada adlaw. Ang mga numero sa ulohang buhatan gikan sa rehiyonal nga mga buhatan nga bahaw sab og pila ka adlaw sa mga numero sa LGUs.

 * * *

Mao ni ang posibleng usa sa mga buslot sa kampanya batok sa COVID-19. Kanunayng nauwahi ang gobyerno pagbaraw sa mas paspas nga tinakdanay kay bahaw ang kasayuran nga gibasehan sa mga lagda. Ambot nganong wa g’yud mahapsay ang pagsaw-anay og mga numero sa DOH ug LGUs aron maangkon ang real-time nga kasayuran nga maoy gikinahanglan paghaw-as sa nasud gikan sa pandemya.

Ambot kon problema ba lang ni sa teknolohiya. Kuyaw kon hangtod karon wa pa mahuman ang patas-anay og garbo ug iyahay sa nagkalainlaing mga sanga sa gobyerno.

 * * *

Sampol: Nipahibawo ang Kapitolyo sa Negros Oriental nga duna silay 168 ka bag-ong kaso sa COVID-19 niadtong Mayo 14. Sa pikas nga bahin, nitaho ang DOH Central Visayas nga ang Negros Oriental may 48 ka bag-ong kaso sa Mayo 14 (Biyernes), 54 ka bag-ong kaso sa Mayo 15 (Sabado) ug usa ka bag-ong kaso sa Mayo 16 (Dominggo).

Pila pa man ka adlaw ang atong paabuton una maapil sa listahan sa DOH-7 ang tinuod nga ihap sa bag-ong mga kaso sa Negros Oriental?

 * * *

Nisamot ang kalibog tungod sa inadlawng mga taho sa nasudnong DOH nga kapin sa gatos ang nangamatay sa COVID-19. Kasagaran nangamatay sa niagi pang mga buwan, duna gani sa niagi pang tuig, nga pasiunang giila nga recoveries pero napamatud-an nga nangamatay diay.

Ang kanunayng pagpaburot sa ihap sa recoveries, pagpahiyos sa ihap sa nangamatay ug pagdumili sa pagtarung sa sistema sa mas paspas nga binayloay og kasayuran makapalig-on sa mga pasangil nga mas gitutokan sa DOH ang pag-doktor sa mga numero kay sa pagtambal sa mga pasyente sa COVID-19.

DOH LGUS
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with