Karong gidawat na ni retired Supreme Court senior associate justice Antonio Carpio ang hagit ni Presidente Rodrigo Duterte sa debate sa West Philippine Sea, nahibawo na mi sa lusot sa presidente aron di siya mauwawan:
Lahi ni Carpio nga retirado na, ang presidente padayong naghupot sa labing taas nga katungdanan maong kaliboan ang iyang gimbuhaton ug nahigot na sa tibuok tuig sa pag-atiman sa mga butang nga mas mapuslanon kay sa pakiglalis sa kabahin sa nasudnong teritoryo nga, nakatag-an ka, hagbay ra niyang gitahan.
* * *
Aron di kapasanginlang nikakak, mosugyot ming ilista sa presidente (aw, kay busy man suguon si Bong Go nga i-detalye) ang mas dinaliang mga trabaho:
• Pagpauli sa Davao bisan unsang orasa ug bisan unsang adlawa;
• Pag-apong sa mga photoshop ni Bong aron di mabunggo ang alibi kon di na sab ganahang magpakita;
• Pagpaminaw sa bag-ong tsismis sa kaalimuot sa prisohan ni Leila de Lima;
• Pagsusi sa mga tsismis sa lovelife ni Leni Robredo;
• Pag-apura nilang Lt. Gen. Antonio Parlade Jr. ug Communications Undersecretary Lorraine Badoy unsay tsismis sa walhong mga kaila ni Ana Patricia Non;
* * *
• Pagtigom og mga insulto nga ikalabay, kon wa nay laing mahunahunaan, ngadto ni Mar Roxas;
• Pagsusi kon gawas sa sigarilyo ug inom unsa pay mga bisyo ni Grace Poe;
• Pagpangita may kapahimutangan pa ba sa mga suod sa Davao ug San Beda, apil nang mga gitangtang kay nasobrahang pangawat, nga nagmahay nga nakalimtan niya;
• Pagsubli sa lista sa mga ni-isnab niya sa mayor pa sa Davao;
• Pag-andam og bag-ong mga ulog-ulog ug pangayuon sunod nilang istorya ni Presidente Xi Jinping ug Presidente Vladimir Putin;
• Pagbasa sa kinabastosan, kinahugawan, kinaluoran, kinabahoan, kinangil-aran ug kina-kuwanggolan nga posts sa troll army batok sa mga nanaway niya; ug
• Pagpangita og laing kalingawan gawas sa golf, jogging, ug motorsiklo sa tungang gabii sa sunod niyang tago-tago.
* * *
Pero kay posibleng lubagon man sa iyang mga kaatbang, nga nagdahom nga may dag-anan sa 2022, ang mga detalye sa talagsaon niyang liderato, mahimong badlungon si Bong sa di na maglista.
Mahimong mahunahunaan sa presidente nga mas epektibong babag sa debate nga pangayoan na lang si Carpio og medical certificate nga duna pa siyay itlog.