Nanagang nang daan sa Ivermectin

Pipila sa mga timaan nga iresponsable ang mga opisyal sa gobyerno nga nagduso sa Ivermectin di lang isip tambal kon dili panagang g’yud batok sa COVID-19:

• Ilang gidasig ang mga tigpasiugda, kansang usa sa binuang nga mga pasangil mao nga ang Ivermectin biktima sa pakigkonsabo sa kalibotanong mga institusyon sa higanteng mga kompaniya sa tambal nga namugos sa mas mahalon ug di kasaligan nga mga bakuna ug ubang mga tambal, sa way pagpaila sa ilang kaugalingon ngadto sa publiko; ug

• Ang pipila nga nagpaila nanghunaw nang daan og responsibilidad.

 * * *

Nabantang ang suporta sa labing dagkong opisyal sa gobyerno sa Ivermectin kay sa pila ka higayon nga gisibya sa nasudnong telebisyon ang panagsulti nila ni Presidente Rodrigo Duterte ug sa mga sakop sa gabinete, nagsige ang presidente og pakisusi kon tinuod ba nga epektibo ni batok sa COVID-19.

Nisamot paglutaw ang tinagoan nilang suporta dihang nakumbinser nila ang presidente sa pagsugo sa Department of Science and Technology (DOST) sa paglusad og clinical trial sa Ivermectin sa labing daling panahon. Sa way paghisgot kinsa ang moabaga sa dako uyamot nga gasto.

 * * *

Ilang kasuod sa presidente maoy nakakumbinser nilang Kongresista Mike Defensor ug Kongresista Rodante Marcoleta nga bisan mag-apud-apod sila og Ivermectin way polis nga modakop nila ni Food and Drug Administration (FDA) nga mobaraw nila.

Pero aron pagpanagang daan kon matinuod ang pasidaan sa mga eksperto sa posibleng negatibo nga mga epekto sa Ivermectin, blangko ang mga reseta nga giluwatan sa sinugo nilang mga doktor (nga utrong kadudahan kay ang tarung nga mga doktor mobutang man sa ilang ngan ug numero sa PRC ug PTR.

 * * *

Laing timaan unsay ilang himuon kon simbako may madisgrasya sa ilang nakumbinser ang pagdeklarar ni Senate President Tito Sotto nga ang mga nagtomar sa Ivermectin mao ang angay nga basulon sa bisan unsa nga daotang epekto.

Sa di pa mosugal sa Ivermectin, angay’ng tugkaron ang kadudahang postura sa mga politiko nga nagsige og galgal nila. Sama sa mga pangangkon sa milagro batok sa COVID-19, wa hinuon mi klarong ebidensiya nga ang kakuwang og logic sa sinultihan sa mga politiko nanukad sa pagsige na nila og tomar sa, nakatag-an ka, Ivermectin.