^

Siya na lay kurog sa China

ARANGKADA - Leo Lastimosa (The Freeman) - April 21, 2021 - 12:00am

Sa kataposan, human sa dul-an sa usa ka buwan nga pagtak-om, nitingog na si Presidente Rodrigo Duterte parte sa labing bag-ong panghasi sa China sa West Philippine Sea (WPS) --ang pagpunsisok sa 220 ka maritime militia boats sa Julian Felipe Reef nga naa sa sud sa Exclusive Economic Zone sa Pilipinas.

Pero ang iyang pagtingog gawas nga wa kapatin-aw sa lubog nang daan niya nga baruganan sa agresibo nga pangangkon sa China sa atong mga teritoryo sa WPS wa pa g’yud motakdo sa opisyal nga baruganan sa gobyerno sa Pilipinas.

 * * *

Basaha ra gud kon di ba ka makutaw sa iyang mga sulti:

• Puwersa ra ang makapapahawa sa China gikan sa WPS kay gi-okupahan na nila ang pipila ka istruktura sa atong kadagatan ug way katakos ang Pilipinas nga makiggubat sa China;

• Mapilde ang Pilipinas kon magkagubat ang China ug Estados Unidos tungod sa WPS; pero

• Di niya badlungon ang paghakot sa mga isda sa WPS pero ipada niya ang mga barko sa gubat sa Philippine Navy kon hilabtan sa China ang lana ug ubang katigayonan sa kinailawoman sa kadagatan.

 * * *

Bisan niinsistir nga siya ang chief architect sa foreign policy sa Pilipinas, wa siya tuohi sa foreign policy team sa gabinete, labi na nilang Foreign Affairs Secretary Teddy Boy Locsin ug Defense Secretary Delfin Lorenzana.

Kinsa nisukwahi sa iyang pagsurender sa WPS: Gipalayas nila ang China pinaagi sa diplomatic protests ug kusganong mga pamahayag sa media ug nidangop sila sa mutual defense treaty nga mahimong mogamit og puwersa ang mga Amerikanhon pagpanalipod sa nasudnong teritoryo sa Pilipinas.

 * * *

Kon nagduda ka pa kinsay hawod sa foreign policy sa Pilipinas:

• Wa kabadlong si Presidente Duterte sa pagsud sa WPS sa lima ka higanteng mga barko sa gubat sa Estados Unidos; ug

• Bisan sa iyang hulga pagbasura sa Visiting Forces Agreement (VFA), wa kapugong si Presidente Duterte sa Balikatan joint military exercise sa gatosan ka mga sundawo sa Pilipinas ug Estados Unidos.

Sa ato pa, morang blocktimer ang presidente nga maghisgot na gani og foreign policy mahimo ra nga bangilan og waiver: “Ang ipanulti sa presidente iya rang personal nga opinyon ug way labot ang gobyerno.”

WEST PHILIPPINE SEA
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with