Task force ra diay maoy sulbad
Sa kalisod sabton sa mga gipanulti ni Presidente Rodrigo Duterte, nga kasagaran nagkatuiris, nagsud-gawas ug naglutaw, may mga higayon nga makatsamba ka nga may malitok siya nga makapalili nimo unsay tinuod nga naa sa iyang hunahuna.
Sa iyang pag-atubang sa nasudnong telebisyon niadtong Huwebes sa gabii, nga ikaduha na niya karong semanaha, niingon ang presidente nga wa maglangay ang iyang pamunoan sa pagsulbad sa problema sa COVID-19 kay sud lang sa 24 o 48 ka oras human nideklarar ang World Health Organization (WHO) og pandemya, nagtukod dayon siya og task force.
***
Hinaot nga may makahunghong sa presidente nga ang pagtukod sa task force di maoy sukdanan sa kalamposan sa kampanya batok sa pandemya kon dili ang aktuwal nilang labok pagbadlong sa tinakdanay sa kagaw ug pagtabang sa katawhan nga labing naapiki.
Ang katakos sa task force mag-agad sa kalidad sa mga sakop ug sa suporta paghimo sa ilang trabaho. Palihug pahibaw-a sab nga di siya kon dili si kanhi presidente Noynoy Aquino maoy nagtukod sa Inter-Agency Task Force on Emerging Infectious Diseases (IATF-EID) pinaagi sa Executive Order 148 niadtong 2014.
***
Kinsa man ang iyang gitudlong mga sakop sa IATF-EID? Kasagaran ang iyang paborito nga retiradong mga heneral nga suhito sa gubat pero way kasinatian sa pakigkumbati sa kagaw ug pagpamalit ug pag-apud-apod sa mga bakuna.
Maong gawas nga wa nato ma-flatten ang curve kay kaliboan man gihapon ang mga kaso kada adlaw sa tibuok tuig, nisulbong man gani hinuon og kapin sa 10,000 kada adlaw sugod sa niaging buwan, naiwit sab ta sa pagpamakuna.
***
Ang IATF-EID wa niya hatagi og igong gahom ug suporta (wa katabang nga pipila sa ilang mga lagda nipasamot sa kayagaw). Sayon ra niyang gisukwahi ang ilang mga rekomendasyon ug ubang ahensiya sa gobyerno naghimo og sukwahi nga mga lakang.
Labaw sa tanan, ang mga sakop sa IATF-EID pulos hadlok niya. Salamat sa balikbalik niyang pahinumdom nga siya may mandato ug sila wa. Mao nga dihang nangangkon nga ang face mask angayng ihumol sa gasolina, way health secretary nga nipasabot niya. Ug dihang nihulga pagsakmit sa hotels aron himuong mga ospital, way finance secretary ni trade secretary nga nangahas pagbaraw niya.
- Latest
