Gipasagdan na, gibakakan pa

Kaluoy sa healthcare workers sa Pilipinas: Wa lang sila pasagdi, gibakakan ug gigamit pa gyod sa sayop nga mga pangangkon sa kalamposan sa pamunoan ni Presidente Rodrigo Duterte sa kampanya batok sa COVID-19.

Si Health Secretary Francisco Duque, nga karibalan lang sa presidente sa pagka tagulilong sa pandemiya, nipahibawo nga gi-swab test ang healthcare workers kada duha ka semana. Pero nisumbalik ang Filipino Nurses United (FNU) nga gawas nga way test gipatrabaho sila og 12-16 ka oras kada adlaw.

 * * *

Labing klarong timaan sa pagpabaya sa gobiyerno mao ang pag-awas na sa mga ospital sa Metro Manila nga namalibad na sa mga pasyente ug maoy gibasol sa pagdaghan sa mga nangamatay sa COVID-19 nga wa gani makasud sa mga ospital ni maatiman sa mga doktor.

Di malalis nga ebidensiya sa inhustisya nga nahiagoman sa healthcare workers sa Pilipinas mao ang paglansang sa gobiyerno sa ilang mga suholan ug benepisyo nga layo na og biya sa mga gidawat sa healthcare workers sa silingan nga mga nasud.

 * * *

Palihug basaha ning average nga binuwan nga suholan sa healthcare workers sa Pilipinas ug silingang mga nasud gikan sa Ministry of Manpower sa Singapore nga gipagawas sa Bol-anong kanhi direktor heneral sa National Economic and Development Authority (NEDA), Ernesto Pernia:

• Doctors: Pilipinas, P106,494; Vietnam, P175,723; Thailand, P226,551; Singapore, P830,536; ug Indonesia, P98,308.

• Nurses: Pilipinas, P39,924; Vietnam, P63,838; Thailand, P83,831; Singapore, P235,629; ug Indonesia, P79,779.

• Medical technologists: Pilipinas, P29,734; Vietnam, P57,563; Thailand, P65,638; Singapore, 212,086; ug Indonesia, P63,624.

 * * *

Sa suweldo ra sa mga doktor ta nakalabaw sa Indonesia. Pero hingpit nang nalabwan sa atong mga silingan. Mas dagko pa og suweldo ang healthcare workers sa Vietnam nga mas kabos sa Pilipinas (segun ni Pernia nalabwan na hinuon ta sa Vietnam sa niaging tuig kanus-a nitubo ang ila ug nihiyos ang atong ekonomiya).

Maong di mabasol ang kaliboan sa atong healthcare workers nga napugos pagtrabaho sa ubang kanasuran aron makahatag og mas maayong ugma sa ilang pamilya. Pun-an sa kapakyas sa gobyerno pagtukod og dugang ospital, di kahibudngan nga kitay nalumos dayon sa pagsulbong pagbalik sa mga kaso.