Nganong nagkamang ang pamakuna
Ikatulong semana na sa Abril 2021, upat na ka buwan human nakabuylo sa pagpamakuna ang ubang kanasuran, mingaw pa gihapon ang pagpamakuna sa Pilipinas. Pabilin nga pakyas ang mga pasalig sa pamunoan ni Presidente Rodrigo Duterte nga mangabot na ang minilyon ka doses sa nagkalainlaing bakuna.
Unang timaan sa atong higanteng problema sa bakuna: Mas unang nangabot ang hinabang nga mga bakuna gikan sa Covax (COVID-19 Vaccine Access) sa World Health Organization (WHO) ug China kay sa mga bakunang pinalit ginamit ang binilyon ka pesos nga utang nga kitay magbayad.
* * *
Nipasalig si vaccine czar Carlito Galvez nga minilyon ka doses ang mangabot niadtong Pebrero. Gawas sa donasyon sa China, way bisan usa ka dose nga pinalit ang niabot. Nipasalig na sab siya nga minilyon ka doses ang mangabot niadtong Marso. May nangabot tuod pero ang tunga ra sa milyon ka doses nga hinabang sa Covax ug usa ka milyon ka doses nga pinalit gikan sa China.
Hapit nang tungatunga sa Abril pero di nang kapaneguro si Galvez kanus-a mangabot ang dugang donasyon sa Covax ug pinalit nga bakuna gikan sa China.
* * *
Laing di maayong timaan: Nagkamang ang pasiuna nga pagpamakuna bisan kapin na sa buwan nga nasugdan. 36% pa ang nagamit sa nangabot nang 2.5 milyones ka doses ug katunga pa sa healthcare workers ang nabakunahan.
Gawas sa panagana sa kaluwas ug ka-epektibo sa Sinovac ug AstraZeneca, nakalawgaw ang pagpanghilabot sa mga politiko nga gidasonan sa Malakanyang pinaagi sa pag-usab sa prioritization list nga gitupong nang mga mayor sa mga doktor ug nurses.
* * *
Wa katabang sa pasiunang pagpamakuna nga ang gitudlo nga tagduma retiradong heneral nga suhito sa gubat pero wa kasuway sa pagpangompra og bisan usa ka garapa sa bakuna. Silang Galvez ug kaubanan, nga mao ray gibiliban ni Presidente Duterte, gitulisok sab sa taphawng liderato sa kampanya batok sa COVID-19.
Kinadak-ang problema: Ang pagtuo sa presidente ug iyang mga tinudlo nga mapatuman ang pagpamakuna ug masulbad ang pandemya pinaagi sa istorya. Ilang kapin na sa tuig nga pagarpar niresulta sa mas paspas nga tinakdanay sa Metro Manila ug kasilinganang mga probinsiya. Manguros tang daan kon daugon gihapon sa istorya ang pagpamakuna.
- Latest