Paburot ug pahiyos sa mga numero
Kaduha ta mapugwat sud lang sa upat ka adlaw tungod sa kinatas-ang mga numero nga gipagawas sa Department of Health (DOH) sa bag-ong mga kaso ug nangamatay sa COVID-19 uban ang pag-angkon nga pulos nanukad sa buslot sa ilang sistema:
• Niadtong Abril 2, Biyernes Santo, niabot og 15,310 ka bag-ong kaso kay napun-an sa 3,709 ka kaso nga wa maihap sa Marso 31; ug
• Niadtong Martes, Abril 6, niabot og 382 ang naihap nga nangamatay kay naapil ang 341 ka patay sa wa pay Abril nga wa malista.
* * *
Mas makapakugang ang nahibaw-an ni Edson Guido, pangu sa ABS-CBN Data Analytics Team, nga may mga nangamatay sa Agosto sa niaging tuig, o walo ka buwan ug unom ka hubkas nang nilabay, nga Abril 6 pa naihap:
• Walo ang namatay sa Agosto 2020 hangtod sa Enero 2021;
• 63 ang namatay sa Pebrero 1, 2021 hangtod sa Marso 15, 2021; ug
• 270 ang namatay sa Marso 16-31, 2021.
Pero sama sa naandan wa kapasabot ang DOH nganong wa pa matarung ang ilang sistema kapin sa tuig na human sa pag-ulbo sa pandemya.
* * *
Kay hapit kada adlaw nga nasayop ang DOH pag-ihap sa bag-ong mga kaso, nangaayo ug nangamatay sa COVID-19. Sampol lang, niang pipila sa inadlaw nilang erratum sa Oktubre 2020:
Oktubre 14, nadoble og lista ang 85 ka recoveries ug 17 ka recoveries patay diay; Oktubre 15, kaduha naihap ang 77 ka recoveries ug pito ka recoveries patay diay; Oktubre 16, kaduha nalista ang 74 ka recoveries ug walo ka recoveries patay diay; ug Oktubre 17, nadoble og ihap ang 78 ka recoveries ug 14 ka recoveries patay diay.
* * *
Kon unsa may buslot sa sistema sa DOH nga wa katapaki hangtod karon may pakapin nga malisya: Nipaburot sa gidaghanon sa nangaayo ug nipahiyos sa gidaghanon sa nangamatay. Pero di maluok sa DOH ang tinuod nga ihap.
Ang Philippine Statistics Authority (PSA), nga mas maayong moihap, maoy gitahasan pagsubay sa tanang death certificates. Ilang ihap: 27,967 ang nangamatay sa COVID-19 hangtod sa Disyembre 31 sa niaging tuig; o 202.41% sa 13,817 ka patay nga gilista sa DOH hangtod sa Abril 6, 2021.
- Latest
