Nganong wa pa moawas
Nalabwan sa kinatas-ang sulbong sa bag-ong mga kaso sa COVID-19 sa mga siyudad ug lungsod sa Sugbo karong tuiga ang kinadaghanan nilang kaso sa niaging tuig. Mao ni gibutyag sa kinabag-ohang subay sa nasudnong tracker sa Department of Health (DOH).
Angay ba tang maalarma? Nagpasabot ba ning niabot na dinhi ang mas mananakod nga variants sa kagaw? O nilikoy na sang lokal nga mga opisyal sa swab testing, pagsubay sa tanang posibleng natakdan ug pagbuwag ug pagtambal dayon nila sa di pa manakod sa mas daghan?
***
Segun sa DOH, ang kinadaghan nga bag-ong kaso sa Cebu City karong tuiga niabot og 1,441 sa semana sa Pebrero 11-17; labaw sa kinatas-an niyang kaso dihang giila pang epicenter sa COVID-19 sa tibuok nasud niadtong semana sa Hunyo 4-10 nga niabot og 962.
Sa pikas nga bahin, ang kinadaghanan nga bag-ong kaso sa probinsiya sa Sugbo karong tuiga niabot og 666 sa semana sa Pebrero 18-24; labaw sa kinatas-an niyang kaso sa niaging tuig sa semana sa Hulyo 9-15 nga niabot og 535.
***
Mao sab ang nahitabo sa Mandaue City: Ang kinadaghanan niyang bag-ong kaso karong tuiga niabot og 332 sa semana sa Pebrero 11-17; labaw sa kinatas-an niyang kaso sa niaging tuig nga niabot og 263 sa semana sa Hulyo 2-8.
Susama ang kahimtang sa Lapu-Lapu City: Ang kinadaghanan niyang bag-ong kaso karong tuiga niabot og 424 sa semana sa Pebrero 18-24; labaw sa kinatas-an niyang kaso sa niaging tuig nga niabot og 348 sa semana sa Hunyo 25-Hulyo 1.
***
Ang bentaha karong tuiga mao nga di pa sama kataas ang lahutay sa pagsulbong sa bag-ong mga kaso, maong wa pa moawas ang mga ospital. Sa niaging tuig, niabot og 20 ka semana nga gatosan ang bag-ong mga kaso sa Cebu City (Abril 9 hangtod sa Agosto 26) ug sa probinsiya sa Sugbo (Hunyo 4 hangtod sa Oktubre 21).
Di pa hinuon kakumpiyansahan. Kay padayon pa nga tagkapin sa gatos ang inadlaw nga bag-ong mga kaso sa Cebu City (siyam na ka semana, Disyembre 31 hangtod sa Marso 3) ug sa probinsiya sa Sugbo (walo na ka semana, Enero 7 hangtod sa Marso 3).
- Latest