^

Nasakpan ang laing pamakak

ARANGKADA - Leo Lastimosa (The Freeman) - February 25, 2021 - 12:00am

Paborito nga panagang sa mga politiko ug sa lokal nga mga tagduma sa Department of Health (DOH) sa pagsulbong pagbalik sa bag-ong mga kaso sa COVID-19 sa Sugbo mao nga di ta angay nga maalarma kay nagpabilin nga ubos ang critical care utilization rate sa mga ospital.

Gipasaligan ta nila nga bakante pa ang publiko ug pribado nga mga ospital. Mao nga bisan sa pagdaghan sa bag-o nga mga kaso, makahimo pa ang mga doktor ug nurses ug ang kahimanan sa mga ospital sa pagdawat ug pagtambal sa dugang mga pasyente.

 * * *

Gilokan ta ining maong pasalig. Kay mao sab ni ang ilang gibalikbalik sa niaging tuig dihang nahimo na nga epicenter sa COVID-19 sa tibuok Pilipinas ang Dakbayan sa Sugbo. Apan nasakpan nga namakak sila dihang gilili na sa Inter-Agency Task Force (IATF).

Si Dr. Tony Leachon, nga sakop pa sa IATF niadtong higayona, mao ang gisumbongan sa lokal nga mga doktor nga niawas na ang ilang mga ospital ug namalibad na sa dugang mga pasyente. Dihang gipahibawo ni Leachon sa publiko ang iyang nahibaw-an, gitaktak siya sa katungdanan.

 * * *

Karong semanaha, di si Leachon kon di ang opisyal nga mga numero sa DOH ang nisukwahi sa pangangkon nga nagpabiling ubos ang critical utilization rate sa mga tambalanan kay ang Central Visayas (kansang kinabag-an sa mga kaso gikan sa Sugbo) maoy:

• Kinatas-an og utilization rate sa isolation beds, 49.5%;

• Kinatas-an og utilization rate sa mechanical ventilators, 33.1%;

• Ikaduha nga kinatas-an og utilization rate sa ward beds, 41.6%; ug

• Ikaupat nga kinatas-an og utilization rate sa ICU beds, 50.6%.

 * * *

Nitambag ang DOH nga ang critical utilization rate sa mga tambalanan alang sa mga pasyente sa COVID-19 kinahanglan nga mas ubos kay sa 30%. Aron nga may igo pang mga higdaanan, kahimanan ug, labaw sa tanan, mga kawani nga makaatiman sa ubang mga pasyente nga lain ang mga sakit.

Ang critical utilization rate sa Sugbo ug Central Visayas sa isolation beds, mechanical ventilators, ward beds ug ICU beds pulos labaw sa 30% nga gitakda sa nasudnong buhatan sa DOH. Hinaot nga mohunong na sa pagpamakak ang lokal nga DOH ug mga politiko.

COVID-19 DOH
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with