Nganong iwit ug nihit sa bakuna
Samtang ang Pilipinas mao ang usa sa labing daghan og nangamatay ug nangasakit sa COVID-19 sa tibuok Southeast Asia, siya ang usa sa kinagamyan og nakompra nga mga bakuna ug usa sa kina-uwahian nga makasugod sa pagpamakuna karong tuiga.
Bisan sa abundang pasalig ni vaccine czar Carlito Galvez wa pay bisan usa ka bakuna nga napamatud-ang luwas ug epektibo ug may pagtugot sa Food and Drug Administration (FDA) ug Department of Health (DOH) nga nakaabot sa nasud. Bugtong ikapasigarbo sa Malakanyang mao ang gipayuhot nga ilegal nga bakuna sa Presidential Security Group.
* * *
Si Presidente Rodrigo Duterte ang usa sa labing sayo ug mao ang labing subsob nga nipasalig nga mag-una ang Pilipinas sa pagpamakuna batok sa COVID-19. Sige siyang balikbalik nga ang Pilipinas mao ang unang mahatagan sa mga bakuna sa China ug Russia.
Apan sulti ra diay siya kutob. Ang mga pangu sa ubang kanasuran, nga di sama kasabaan, mas una nga nakigsabutsabot sa mga kompaniya nga nakamugna sa labing masaaron nga mga kandidato nga bakuna ug nipirma dayon og mga kontrata sa pagpamalit og minilyon ka doses sa mga bakuna.
* * *
Mao nga ang Singapore ug Indonesia nakabuylo na sa pagpamakuna sa ilang health workers ug uban nga labing nagkinahanglan og panagang. Ang Thailand ug Malaysia nakadawat na sa ilang mga gikompra ug gitakda nga magsugod na sa pagpamakuna sa sunod buwan.
Ang Vietnam, nga bisan mas kabos sa Pilipinas apan mas malampuson sa pagbadlong sa COVID-19, may kontrata na alang sa 30 milyones ka doses sa bakuna sa AstraZeneca ug molusad og human trials sa ilang kaugalingong bakuna.
* * *
Bugtong kontrata nga napirmahan na sa pamunoang Duterte mao ang pagkompra og 30 milyones ka doses sa bakuna sa Novavax. Nga wa pa kahuman sa Phase 3 sa ilang clinical trials ug kon mapamatud-an man nga luwas ug epektibo unya pa sa Marso labing sayo nga makapangayo og pagtugot.
Gikataho nga hagbay ra nga nikatap ang bakuna sa Sinovac sa Pilipinas. Apan giklaro ni Galvez nga wa pay kontrata nga napirmahan alang sa 25 milyones ka doses nga ilang komprahon. Kay utro man sab nga wa pay pagtugot ang Sinovac gikan sa FDA ug DOH.
- Latest
