^

Kapugngan ang kanihit ug kamahal

ARANGKADA - Leo Lastimosa (The Freeman) - January 22, 2021 - 12:00am

Nitiyabaw na ang mga tigkompra sa inadlaw nga mga panginahanglan sa kabalayan sa kalit nga pagsulbong sa mga presyo sa bugas, utanon, karne, lamas, ug uban pang palitunon sa kamerkadohan ug mga tindahan. Usa sa nakapakugang sa mga mamalitay sa among merkado publiko sa Consolacion sa amihanang Sugbo mao ang pag-uminto sa presyo sa kalbasa nga, kaniadto napalit nila og P15 ang buok, karon tag-P100 na.

Nipasabot ang mga mamaligyaay nga tungod ni sa naandan nga panagdungan sa duha ka hinungdan: Ang kanihit sa suplay ug ang pagsaka sa demanda.

 * * *

Gilista dayon sa Departamento sa Agrikultura (DA) ang mga hinungdan sa kanihit sa suplay sa mga produkto sa pagkaon:

• Tungod sa padayon nga pandemya sa COVID-19, may mga produkto sa agrikultura nga natanggong sa checkpoints ug mga pabrika sa pagkaon nga wa pa makabalik sa naandang operasyon;

• Wa pa makabangon ang mga umahan sa Kabisay-an, Mindanao, ug Luzon nga naigo sa mga bagyo sa niaging tuig; ug

• Nitidlom pag-ayo ang produksiyon sa baboy sa Luzon ug ubang bahin sa nasud nga wa pa makalingkawas sa Africa Swine Fever (ASF).

 * * *

Sa pikas nga bahin, nitumaw ang nagkalainlain nga mga sugyot sa pagbaraw sa padayon nga kanihit sa suplay ug kataas sa presyo sa mga palaliton:

• Giawhag ang Senado sa pagsusi sa posible nga pagmaniobra sa suplay ug presyo sa mapahimuslanon nga mga negosyante;

• Pagpahamtang og price control sa nag-una nga mga panginahanglan sa pagkaon aron nga di magkalisudlisod ang mga konsumidor; ug

• Pagdasig sa katawhan pagpananom sa ilang nataran aron nga makaangkon og kaugalingong tinubdan sa pagkaon.

 * * *

Wa mahisguti ang kinakusgan, hagbay rang napamatud-an apan kanunayng mataligam-an, nga panagang sa umaabot nga kanihit sa suplay ug pagsulbong sa presyo sa mga panginahanglan sa pagkaon: Ang pagpalambo sa katakos sa mga mag-uuma sa pagpalapad sa produksiyon sa ilang mga umahan.

Hain na man ang P10 bilyones nga Rice Competitiveness Enhancement Fund (RCEF) nga gigahin sa Kongreso alang sa mga mag-uuma nga naapiki sa pinatuyangan nga importasyon sa bugas humay? Ang pundo dakong tabang sa mga mag-uuma pagpugas og mga binhi nga makasugakod sa huwaw ug pagtukod og mga bodega nga makapanalipod sa ilang ani gikan sa bagyo.

PRICE
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with