Mas lanog ang buhat sa sulti
Ang tambag ni Presidente Rodrigo Duterte sa mga mayor ug mga gobernador nga kinahanglan nga ang pamaliton nila mao ra ang mga bakuna nga may pagtugot na sa nasudnong gobyerno mosumbalik sa iyang kaugalingon nga pamunoan:
- Gitugotan niya ang bakuna sa Sinopharm nga wa pay pagtugot sa Department of Health (DOH) alang sa mga sakop sa Presidential Security Group (PSG) ug sa gabinete ug gipasidan-an niya ang mga senador nga mosusi unta sa kahiwian; ug
- Ang mga bakuna nga gikontrata ni vaccine czar Carlito Galvez pulos wa pay lisensiya dinhi.
***
Way mayor ni gobernador nga makapangahas og tubag sa presidente nga lisod tuohan ang iyang sulti, tungod sa kaabunda sa ebidensiya sa gidangatan sa mga nisukwahi niya, kay mas lanog ang mensahe sa iyang mga lakang.
Gipamatud-an sa presidente sa dul-an sa lima ka tuig niya sa Malakanyang ug sa usa ka tuig nga pagduma sa pandemya nga ang iyang gusto maoy matuman, bahala nang balaod ug siyensiya (pananglitan: kublan ang mga Pilipinhon sa COVID-19, pauwanan og kemikal ang Pilipinas, ug ang face mask angayng ihumol sa gasolina).
***
Ang mga bakuna nga gipahibawo ni Galvez nga nakontrata na niya wa pay Emergency Utilization Authority (EUA) gikan sa Food and Drug Administration (FDA): Sinovac Biotech sa China nga mopada og 25 milyones ka doses; ug AstraZeneca nga palitan og 20 milyones ka doses.
Ang kinadak-ang supplier, Covovax (o Novavax), mao pay pagsugod sa Phase 3 sa clinical trials. Ang Pfizer/BioNTech nga may EUA sa FDA na karong semanaha way kontrata sa Pilipinas apan makapada na og bakuna sunod buwan pinaagi sa COVAX sa World Health Organization (WHO).
***
Bugtong nalipay sa tambag sa presidente mao si Cebu City Mayor Edgar Labella: Mosud lang sila og transaksiyon kon may EUA nang mga kompaniya sa bakuna. Apan tungod sa kataphaw sa panghunahuna ni Labella, mahimong Cebu City ang kina-iwitan.
Tungod sa kadaghan ug kadinalian sa panginahanglan ug kanihit sa kalibotanong suplay, gawas nga mas daghan og kuwarta ang ubang kanasuran, kinahanglan tang mangontrata ug mobayad daan aron maapil sa nagkataas nga lumbay sa mga nag-atang sa mga bakuna nga himuonon pa sa nagkapuliki nga mga pabrika.
- Latest
