Nagduka sa bakuna
Sa labing unang higayon, napakita pinaagi sa mga numero ang di makiangayon nga pag-apud-apod sa mga bakuna batok sa COVID-19: Nahigot na sa mga kontrata ang 7.1 bilyones ka doses sa mga bakuna, samtang gi-reserba nang daan ang laing 2.6 bilyones ka doses.
Ang adunahan nga mga nasud mao na ang nanag-iya sa 3.8 bilyones ka doses sa bakuna; ang upper middle-income nga mga nasud maoy nakakompra sa 829 milyones ka doses; ug ang lower middle-income nga mga nasud maoy makakuha sa 1.7 bilyones ka doses.
* * *
Bisan sa abunda nga mga pasalig nga di ta maiwit sa pasiuna nga suplay sa mga bakuna, wa pay kontrata nga napirmahan ang Pilipinas uban sa tinubdan nga mga nasud ug mga kompaniya. Kay, sama sa naandan, naunhan na man sa ubang kanasuran, may sukaranan ang mga pasidaan nga ang labing sayo nga mga bakuna nga moabot sa Pilipinas unya pa sa Hunyo o sa dayong tapos sa sunod tuig.
Ubang kabos nga mga nasud nagsalig nga makabakuna sa 20% sa ilang populasyon pinaagi sa COVAX sa World Health Organization (WHO).
* * *
Nia ang lista sa Launch and Scale Speedometer, kahugpongan nga nagsubay sa pag-apud-apod sa mga bakuna, sa labing dagkong kontrata nga napirmahan: Estados Unidos, 2.6 bilyones ka doses; European Union, 2 bilyones; India, 1.6 bilyones; Britanya, 507 milyones; Indonesia, 450 milyones; Canada, 414 milyones; Japan, 290 milyones; Brazil, 196 milyones; ug Mexico, 179 milyones.
Ang Vietnam, nga mas ubos og kita ug populasyon kay sa Pilipinas may kontrata na alang sa 150 milyones ka doses. Bisan ang Bangladesh, usa sa labing kabos nga nasud sa Asya, nakapalit na og 30 milyones ka doses.
* * *
Mga nasud nga apiki og panudlanan nakakompra og mas daghang bakuna pinaagi sa:
• Pagtanyag sa dagkong kapasidad sa ilang mga pabrika aron makadugang sa paspas nga produksiyon; ug
• Pagduma sa clinical trials sa nag-unang mga kandidato nga bakuna sa Moderna, Pfizer, ug BioNTech ug University of Oxford ug AstraZeneca.
May planta untang AstraZeneca sa Pilipinas apan wa magtagad ang gobyerno pagdasig sa lokal nga produksiyon sa bakuna. Mora sang umang ang pagsubli sa mga aplikasyon sa clinical trials.
- Latest
