Mas paspas ug mas mapuslanon

ARANGKADA - Leo Lastimosa (The Freeman) - November 26, 2020 - 12:00am

Hangtod sa niaging tuig, way motuo nga may bakuna nga mamugna sud lang sa usa ka tuig. Kay wa pa na sukad mahitabo. Kasagaran sa nangagi nga mga bakuna namugna human sa makuti nga pagtuon nga nilungtad og tagpila ka dekada.

Apan ang pandemya sa Covid-19, nga nakapaluhod sa kalibotan, nakapapugwat sa industriya sa mga tambal ug bakuna. Sud lang sa duha ka buwan human namantala ang kinaunahan nga genome sequencing data sa kagaw, namugna ang mga bakuna. Nga mahimong maaprobahan na human lang sa siyam ka buwan nga pagtuon.

* * *

Nipasalig ang mga siyentipiko nga way gilaktod nga mga panginahanglan sa pagtino sa kaluwas ug ka-epektibo sa mga kandidato nga bakuna. Igo lang gipaspasan ang naandan nga burukrasya sa pagsubli sa mga sangpotanan sa tulo ka hugna sa clinical trials.

Mas dali nga namugna ang mga bakuna batok sa Covid-19 tungod sa pagbaha sa mas dagko nga pundo sa mga gobyerno ug pribado nga mga kompaniya sa nagkalainlaing kanasuran ug pagtingob sa mga paningkamot sa mas daghan nga eksperto ug pagpalihok sa mas bag-o nga mga teknolohiya ug kahimanan.

* * *

Kinadak-an nga mananaog sa kalibotanong mga paningkamot pagbadlong sa Covid-19 mao ang teknolohiya sa mRNA, nga wa pa sukad magamit sa paghimo og bakuna, nga mosugo sa lawas sa paghimo og iyang kaugalingon nga panagang batok sa kagaw.

Mas una nga namugna ang duha ka bakuna gikan sa mRNA sa Pfizer/BioNTech ug Moderna kay mas dali ang proseso, nalaktawan ang langay nga paghagpat sa pinahuyang nga kagaw nga maoy gigamit sa Oxford ug AstraZeneca ug ubang mga kompaniya.

* * *

Tungod ini, gipaabot ang mRNA nga hatagan og dugang pagtagad sa mas daghan nga siyentipiko ug mga eksperto ug buboan og mas abunda nga puhonan sa mas daghan nga kanasuran ug mga kompaniya aron paghimo og mas luwas ug mas epektibo nga mga bakuna ug mga tambal.

Sunod nga kalibotanon nga lumba mao ang pagmugna og mga tambal ug mga bakuna sud lang sa duha ka buwan o mas mubo pa nga higayon. Di lang batok sa Covid-19 kon dili batok sab sa kanser ug uban nga wa pay kaayuhan nga makamatay nga mga sakit.

COVID-19
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with