May nihangop apan duna say nisaway sa talagsaon nga pagtuon nga ilusad sa Britanya sa pagtuyo pagtakod sa SARS-Cov-2, ang kagaw nga mosangpot sa COVID-19, sa himsog nga mga boluntaryo alang sa mas dinalian nga pagpangita og mas epektibong mga bakuna ug mga tambal.
Bisan sa dakong risgo, kay may mga komplikasyong wa pa mahibaw-i, ang Britanya mobubo og 33.6 million pounds (P2.1 bilyones) sa pagtuon nga dumalahon sa Imperial College London uban sa Department for Business, Energy and Industrial Strategy ug Royal Free London NHS Foundation Trust.
* * *
Di ni maoy unang pagtuon sa iyang matang. Duna nay gihimo nga susamang human challenge studies sa nangaging katuigan sa pagmugna og mga bakuna batok sa mga sakit sama sa tipos, malaria ug cholera.
Apan ang Estados Unidos ug ubang kanasuran nagdumili paglusad sa samang pagtuon batok sa COVID-19 tungod sa kapaspas pagmugna og mga tambal. May 46 na ka kandidatong bakuna nga gipaubos sa human testing, 11 nila naa na sa phase 3 trials, ang pipila gipaabot nga mopahibawo sa mga sangpotanan karong tuiga o sayo sunod tuig.
* * *
Ang tinuyo nga tinakdanay sa COVID-19 sa Britanya sugdan karong Enero kon may pagtugot na gikan sa ethics committees ug mga tagduma sa kahimsog. Gipaabot nga molungtad og lima ka buwan. Andam nang 90 ka boluntaryo nga nagpangedaron og 18-30.
Ang pagtuon himuon sud sa Royal Free Hospital sa London. Diin ang mga boluntaryo panid-an sud sa usa ka tuig aron pagtino nga di sila mahiagom og malungtaron nga kadaut.
* * *
Kasagaran sa mga boluntaryo ganahan nga motampo sa mga paningkamot sa pagtapos sa hulga sa kahimsog nga nakapaluhod sa kalibotanong ekonomiya. Nanghinaut sila nga pinaagi sa tuyo nila nga pagpatakod mas paspas nga matubag ang mga pangutana sa gidaghanon sa kagaw nga makapasakit, kataas sa panagang sa mga nataptan ug kahigayonan nga matakdan pag-usab.
Bisan may mga bakuna nang gipaabot nga maaprobahan karong Disyembre o Enero, ipadayon gihapon sa mga tigpasiugda ang pagtuon. Kay kumbinsido sila nga gikinahanglan ang mas daghan ug mas epektibong mga bakuna nga kapahimuslan sa mas daghang katawhan, labi na sa kabos nga kanasuran nga maoy labing nagkalisudlisod tungod sa pandemiya.