Limitasyon sa mga bakuna

Sa kataposang ihap, dunay walo ka kandidatong bakuna nga gipaubos na sa kataposang hugna sa lapad nga pagtuon sa kaliboan ka boluntaryong pasyente pagsukod sa ilang ka-epektibo pagsagang sa COVID-19. Kabahin sila sa 196 ka kandidatong bakuna nga gisunod sa World Health Organization (WHO).

Gawas lang sa China ug Russia nga pulos nangangkon nga nagsugod na og gamit sa ilang mga bakuna, way bisan usa sa mga kandidatong bakuna sa ubang kanasuran nga kahatagan og pagtugot karong buwana. Labing sayo nga pangagpas sa unang hugna sa pagpamakuna inay Septiyembre unya na sa Pasko karong tuiga.

 * * *

Ang duha ka higanteng kompaniya sa Estados Unidos, nga klarong nilikay nga kapasanginlang nagpagamit sa politika, nga makapasamot sa pagduda sa katawhan sa kakasaligan sa ilang pagtuon, nipahibawo nga liwas na sa piniliayng presidensiyal sila mangayo og pagtugot sa ilang mga bakuna. Gisukwahi nila ang pasalig ni Presidente Donald Trump nga mabakunan nang mga Amerikanhon sa di pang piniliay sa Nobyembre 3.

Ang Pfizer niingon nga unya na sila mosumiter sa ilang aplikasyon sa Food and Drug Administration (FDA) sa ikatulong semana sa Nobyembre. Samtang ang Moderna nipahibawo nga mangayo sila sa pagtugot sa FDA unya sa Nobyembre 25.

 * * *

Ang bakuna sa Wuhan Institute of Biological Products gigamit na sa health workers sa United Arab Emirates. Ang China nangangkon nga kapin na sa 100,000 sa ilang mga molupyo ang nabakunahan. Ang Cansino Biologics nisuway na sab sa ilang bakuna sa mga sundawo sa People’s Liberation Army (PLA) sa China.

Nagpakahilom si Russian President Vladimir Putin human nabisto nga bakak diay iyang pangangkon nga naaprobahan nang ilang bakuna nga Sputnik V kay wa pa man gani kabuylo ang phase 3 sa clinical trials sa Moscow, Pilipinas, ug ubang kanasuran.

 * * *

Nipasidaan ang mga siyentipiko nga ang bisan unsang bakuna nga maaprobahan ug magamit karong tuiga o sayo sunod tuig di pa makabadlong sa pandemya. Kay pipila ra ang mabakunahan, lisod ang pag-apud-apod kay nagkinahanglan og cold storage facilities nga wa sa kasagarang nasud sa kalibotan ug 50% ra nga epektibo batok sa kagaw.

Maong mas epektibo gihapong panagang batok sa COVID-19 ang face masks, physical distancing ug panghunaw sa kamot.