Pagpili sa labing sipsip
ARANGKADA - Leo Lastimosa (The Freeman) - October 2, 2020 - 12:00am

Uwahi na alang sa mga kongresista ang pagpatuo nga sila ang may gahom sa pagpili sa ilang pangu. Human gitahan sa mga nagpapili pagka speaker ang tanang pagpaka aron ingnon nga independente silang sanga sa kagamhanan dihang mora silang itoy nga nagsunudsunod bisan asa si Presidente Rodrigo Duterte aron magpa-bendisyon sa ilang ambisyon sa niaging tuig, napukan nang kaligdong sa institusyon.

Bisan unsaon og tampok sa ilang dughan ug padako sa ilang tingog nga ang kabubut-on sa kinabag-an ang masunod, nahibawo ang mga kongresista kinsay tinuod nga magbuot sa mangu nila.

***

Kinaunahan ning padaylang sa Malakanyang. Sa nangaging mga pamunoan alyado sa presidente maoy nangu sa House of Representatives kay ang mga kongresista nagsalig sa palasyo sa mga proyekto sa ilang distrito. Gawas nga nakapabilib sa mga botante, ang komisyon nakapaburot sa ilang bolsa.

Mas gawasnon ang mga senador sa paggawong sa Malakanyang kay wa sila magkinahanglan og mga proyekto. Sama sa presidente ug bise presidente, tibuok nasud ang nipili nila. Nagkinahanglan hinuon og mas dagkong komisyon aron may magasto paglugway sa ilang termino.

***

Karong nahinayak na si Presidente Duterte sa bantang nga pagpanghilabot sa bugno sa liderato sa House, di lang kausa (niadtong 2019) kon dili kaduha (niadtong Martes sa gabii), ug pagdiktar unsay mga balaudnon ug mga imbestigasyon ang dalidalion, di na siya makapa-goryo-goryo nga gawasnon ang mga kongresista.

Nahukasan na ang tinuod niyang papel sa paghusay ug pagbalik og ulbo sa bugno nilang Speaker Alan Peter Cayetano ug Kongresista Lord Allan Velasco, maong di na siya mapahipi.

***

Bisan kapila pa magwarawara og bibliya si Cayetano pagpangugat nga ganahan ang mayoriya sa mga kongresista nga magpabilin siyang speaker sa mosunod nga duha ka tuig, ug bisan unsaon pa og pakalma-kalma ni Velasco nga tahuron ang kauyonan nga mopuli na siya karong buwana, kitang tanan nahibawo nga ang presidente maoy matuman.

Pulos suod ni Duterte silang Cayetano ug Velasco. Di sayon ang pagpalabi sa usa kay sa lain. Ang pait nga kamatuoran mao nga di nasudnong interes ang pasikaran sa iyang hukom. Pilion niya ang labing takos nga makapanalipod sa iyang personal nga interes hangtod ug lapas sa 2022.

leo_lastimosa@abs-cbn.com

RODRIGO DUTERTE
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with