EDITORYAL - Padayong mag-antos ang Pilipinas

Sama sa gihapon, murag guba nga plaka ang tonada sa Ambassador sa China dinhi sa Pilipinas nga si Huang Xilian sa miingon nga si Pres. Duterte ug ang China nagkasabot na nga ipadaplin lang ang panagilogay sa teritoryo diha sa South China Sea. Diha nahimutang ang West Philippine Sea.

Makadaghan na nilang gipakawalay-bili ang 2016 Arbitral Ruling nga nipabor sa Pilipinas sa pag-ingon nga wala nila giila ang maong hukom. Ang China padayon nga nagmagahi bisan og gikondenar na sa mga kanasuran ang ilang gihimo.

Kung dili barugan ug ipadaplin sa Pilipinas ang desisyon magpadugay kini sa pag-antos sa mga Pilipino nga nasayod tanan nga ang WPS ato ug subay sa international law kita maoy adunay katungod sa tanang bahandi niini.

Gipaantos ang mga mga Pilipino ug sa mosunod pang mga henerasyon. Dunay legal nga basihan ang Pilipinas nga angkunon ang WPS pinaagi sa arbitral ruling.

Kung ang gamay nga nasud sama sa Mauritius nabawi ang Chagos Island gikan sa pag-okupar sa Britanya sa miaging tuig pinaagi sa UN Assembly, nganong dili man kini mahimo nato? Wala man kadto mosangpot sa giyera. Dili kinahanglang isalikway ang maayong relasyon sa duha tungod lang niana, apan hangtud kanus-a man kini kutob?

Kada adlaw sila ray nakabenepisyo sa mga bahandi sa kadagatan sa WPS, kada adlaw minilyon ka pesos nga isda sa mga Pilipinong mananagat ang gihikaw sa China.  Kada adlaw nilang pagpuyo didto napun-an ang kadaut sa kadagatan sa mga Pilipino.

Doble-kara ang dagway sa China, lahi ang gibuhat sa ilang mga kamot sa ilang gipanulti sa atubangan. Mao na kini ang ilang kinaiya dili lang sa Pilipinas kondili hasta sa mga silingan niining mga nasud.

Kun magpadala kanunay sa bulatik ang Pilipinas magpadayon ang pag-antos sa mga Pilipino. Alkanse kaayo bisan asang suok subayon. Kay samtang gitulon nato tibuok ang paon og taga sa ilang linya gibira kita ngadto sa kaalautan.

Samtang kita nagpakamaayong silingan, sila nagtukod og kural nga adunay mga tunok diha mismo sa atong tugkaran.