Nganong wa man dayona?
Human sa kapin sa upat ka tuig nga paghatag nato og hapit matag adlaw og kasayuran nga kuwang, mga pamahayag nga makalibog, mga baruganan nga magkasungi, mga lagda nga taphaw, mga saad nga gipakyas ug mga paukyab nga balikbalik samtang nagtungkawo sa Malakanyang, maanad na unta ta sa bisan unsay isulti ni Presidente Rodrigo Duterte.
Ang nakalahi sa labing uwahi niyang mensahe, bisan kon di na hingpit nga bag-o, maong pagkumpisal nga inutil siya pagbadlong sa pangurakot ug nga nitanyag sa mga sakop sa gabinete sa pagbiya sa iyang katungdanan.
* * *
Kadaghan na siya nireklamo nga naglisod pagsumpo sa pangurakot--ang ikaduha sa duha ka labing dagko niyang saad dihang nagpapili pagka presidente niadtong 2016. Ang unang saad, nga hagbay rang giangkon nga di matuman bisan mapupos nang iyang termino sa 2022, mao ang pagpapas sa ilegal nga drugas sa unang tulo ka buwan sa iyang pamunoan.
Apan mao ni ang unang higayon nga niangkon siya nga di takos sa pagbaraw sa pagpangawkaw. Samtang may kapin pa sa tuig sa iyang termino, nitahan na sa pasalig pagbitay sa mga kawatan sa kagamhanan.
* * *
Klaro na unta ang iyang kumpisal kon wa pa sumpayi sa naandan nga kalibogan: Nitanyag siya sa pag-atubang sa mga sakop sa Kongreso--sa way pagtino kon ang mga senador o mga kongresista ba apan ubos sa kundisyon nga siya ang unang pasultihon--aron tukion unsaon pagbadlong ang pangurakot.
Unsaon man niya pagtuki ang kampanya nga iya nang gideklarar nga di mahimo ug nga way si bisan kinsa nga makapahunong? Patakdan ba lang ang mga magbabalaod sa iyang kaluya?
* * *
Di sab ni unang higayon nga naghisgot siya og resignasyon. Apan gipakapinan niya og detalye nga gihimo niya ang tanyag atubangan sa tanang sakop sa gabinete nga iyang gipatawag. Sama sa iyang nangaging mga pamahayag, wa siya magtagad pagsumpay unsay sangpotanan sa ilang tigom.
Atubangan sa iyang pag-angkon nga wa kahibawo unsaon ug nga di diay makahimo sa pagbadlong sa pangurakot, ang labing mahinungdanong mga pangutana nga wa siya magtagad sa pagtubag ni pagpatin-aw: Nganong wa man niya dayona? Ug unsa may kapuslanan sa pagpabilin sa katungdanan nga di man diay kapatuman sa gipasalig nga kausaban?
- Latest
