Pagsubay sa gamot sa suliran
ARANGKADA - Leo Lastimosa (The Freeman) - September 28, 2020 - 12:00am

May sukaranan ang kabalaka nga nakapasamot sa kalisod sa pagbadlong sa kalibotanong tinakdanay sa COVID-19 ang kahiktin sa gisugyot nga mga sulbad: Pagsul-ob og face mask ug shield, pagpanghinaw, paglay-anay og usa ngadto sa duha ka metro, ug pagpanlimpiyo sa mga trabahoanan.

Gisugyot sa mga eksperto sa nagkalainlaing kanasuran nga mahimong mas epektibo ang kampanya batok sa COVID-19 kon maglakip sa pagsubay ug pagsulbad sab sa gamot nga mga hinungdan sa nagbalikbalik, nag-usab-usab ug nagkagrabe nga mga hulga sa kalibotanong kahimsog, kalikopan, panginabuhi, ug ekonomiya.

 * * *

Ang mga doktor nisugyot nga apilon sa kampanya ang mosunod:

• Paglikay sa kakulian sa panglawas nga nakapasamot sa kamangtas sa COVID-19 sama sa mga sakit sa baga ug kasingkasing;

• Pagpalambo sa mga tambalanan ug mga laboratoryo aron mas takos nang motubag sa umaabot nga mga epidemiya ug paggahin og dugang pundo sa pagpalambo sa kahimsog sa katawhan aron nga mapugngan ang mga sakit; ug

• Pagdugang sa mga bansay-bansay, suholan, ug mga benepisyo sa mga doktor, nurses, ug ubang health workers aron mas andam sila kon simbako modaghang mga masakiton.

 * * *

Gawas sa pagdili sa pagpangayam, pagbaligya, ug pagkaon sa ihas nga mga mananap nga gitumbok nga maoy gigikanan sa mga kagaw nga nisangpot sa SARS, MERS, ug COVID-19, giawhag sab ang:

• Pagtubag sa nagkalapad nga tunglo sa kagutom sa nagkadaghan nga katawhan sa labing kabos nga kanasuran; ug

• Paghatag og mga panginabuhi ug pinuy-anan sa mga timawa aron nga di mapalayas gikan sa mga umahan ug mapugos pagpuyo uban sa mga ihas sa kalasangan.

 * * *

Makatabang nato pagtugkad sa kamapuslanon sa pagtubag sa gamot inay sa sanga lang nga mga suliran ang duha ka proyekto nga mas epektibo sa naandang sulbad nga pulbora sa rebelyon sa mga komunista sa atong nataran:

• Ang transcentral highway sa kasadpang Sugbo nakakumbinser sa mga mag-uuma sa Barangay Gaas ug ubang bahin sa Balamban pagtahan sa armadong pakigbisog kay makatumod na sa ilang abot ngadto sa Carbon; ug

• Ang circumferential road sa Bohol nipahuyang sa New People’s Army (NPA) sa Carmen ug kasilinganang kalungsoran kay ang mga mag-uuma nahimo nang tour guides sa pagdagsa sa lokal ug langyaw nga mga turista.

COVID-19 VACCINE
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with