Nuggets mitiklo sa La Clippers abante west finals batok Lakers

CEBU, Philippines — Mipakita og maayong salida si Jamal Murray diin mipabuto kini og 40 aron pangulohan ang Denver Nuggets nga mitiklo sa inilog nga Los Angeles Clippers, 104-89 sa tagakay nga Game-7 aron pag-abante sa NBA Western Conference Finals.

Si Nikola Jokic mirehistro og "triple-double" alang sa Nuggets nakasulod sa NBA Western Conference finals sa labing unang higayon sud sa 11 ka tuig.    

Doble ang pagmaya sa Nuggets ubos ni coach Michael Malone gumikan kay nahimo man silang labing unang team sa kasaysayan sa NBA nga milampos human malubong og 3-1 sa usa ka serye duha ka higayon sa susamang post-season.

Gikumpleto ni Jokic ang iyang "triple-double" sa ikatulong kuwarter diin siya mitapos uban ang 16 puntos, 13 ka assists ug 22 ka rebounds.

Ang rebounds ni Jokic maoy labing daghan sa usa ka Nuggets player sa NBA playoffs. Iyang gipapas ang kaugalingon ra sab niyang rekord nga 19 ka rebounds.

Sama sa ilang tapad sa Clippers, ang Nuggets mao gihapon ang dehado sa ilang pakigsangka ni LeBron James ug sa gamhanang Los Angeles Lakers sa Western Conference Finals nga sugdan karong Sabado.

Apan ning sayo pa, si Murray dunay pahimangno sa Lakers.

"They got to worry about us too," sumala pa ni Murray.

Ang Nuggets alkansi og 12 puntos  sa halftime. Biya gihapon sila og siyete puntos, 61-54  sa nahabilin nga 10:50 sa ikatulong kuwarter, apan milusad og makabungog nga 35-13 run aron pagposte og 15 puntos nga labaw sa katapusang kuwarter nga  maoy nakapabarag sa Clippers sa nahibiling bahin sa duwa.

"Next is Lakers, another tough opponent," matud pa ni Jokic. "But we are going to be out there having fun. It is simple for us, effort and energy."